ငလျင်ဒဏ်သင့် မြန်မာနိုင်ငံတဝန်းရှိ ကလေးငယ်တွေဟာ အကူအညီ မလုံလောက်မှုကြောင့် သေဆုံးနိုင်ခြေရှိကြောင်း ကုလသမဂ္ဂ ကလေးများရန်ပုံငွေအဖွဲ့ (UNICEF)ရဲ့ အာရှ-ပစိဖိတ်ဆိုင်ရာ စည်းရုံးရေးအကြီးအကဲ အီလ်ယန်လူတီက ရိုက်တာသတင်းဌာနကို ဧပြီ ၁ ရက်မှာ ပြောပါတယ်။

ဘန်ကောက်မြို့မှာလုပ်တဲ့ ရိုက်တာအင်တာဗျူးမှာ UNICEF အရာရှိ အီလ်ယန်က “ရောဂါပြန့်ပွားဖို့ အလားအလာ အရမ်းများတာကြောင့် ကလေးတွေဟာ သေဆုံးနိုင်ခြေ ရှိနေပြီး ငလျင်ဒဏ်ခံ ဒေသတွေမှာ ရောဂါတွေ ရှိလာမယ်။ သန့်ရှင်းတဲ့ရေ၊ ဆေးဝါး လုံလုံလောက်လောက် မရရှိနိုင်ရင် အာဟာရချို့တဲ့မှု အန္တရာယ်ရှိလာမယ်။ နာတာရှည် ပြင်းထန်တဲ့ အာဟာရချို့တဲ့မှု ပိုများလာနိုင်တယ်” လို့ ဖြေကြားထားပါတယ်။

မြန်မာနိုင်ငံတဝန်း ငလျင်ဒဏ်သင့်ဒေသတွေမှာ သေဆုံးသူတွေထဲ “ရာနဲ့ချီတဲ့ ကလေးငယ်တွေ” လည်း ပါဝင်နေမှာဖြစ်ပြီး ငလျင်မလှုပ်ခင်တုန်းကလည်း ဖြစ်ပွားနေတဲ့ ပြည်တွင်းစစ်ကြောင့် လူသားချင်းစာနာ ထောက်ထားမှုဆိုင်ရာ အကူအညီတွေ လိုအပ်နေတာဖြစ်ကြောင်း သူနဲ့ UNICEF လုပ်ဖော်ကိုင်ဖက်တွေက ယုံကြည်ထားတယ်လို့ အီလ်ယန် လူတီက ပြောဆိုပါတယ်။

မြန်မာနိုင်ငံမှာ လူပေါင်း ၃,၈၀၀ ကျော် သေဆုံးခဲ့ရတဲ့ မတ် ၂၈ ရက် ငလျင်လှုပ်ခတ်မှုကြောင့် ဘေးဒဏ်သင့် ထိခိုက်သူတွေကို ကူညီနိုင်ဖို့အတွက် ကယ်ဆယ်ရေးနဲ့ ဘေးအန္တရာယ် လျော့ပါးသက်သာရေးတို့ကို အဆောတလျင် လုပ်ဆောင်နေရချိန်မှာ UNICEF တို့လို ကုလသမဂ္ဂ အေဂျင်စီတွေဟာ အကူအညီတွေ တိုးမြှင့်လုပ်ဆောင်ဖို့ ကမ္ဘာ့အသိုင်းအဝိုင်းကိုလည်း တိုက်တွန်းနေပါတယ်။

ဆေးရုံတွေမှာ လူနာတွေ ပြည့်လျှံနေပြီး အခြေခံအဆောက်အအုံ ပျက်စီးမှုနဲ့  ပြည်တွင်းစစ်ကြောင့် ကယ်ဆယ်ရေးလုပ်ငန်းတွေ နှောင့်နှေးနေရတယ်လို့ ကုလသမဂ္ဂ အေဂျင်စီတွေက ပြောပါတယ်။

ဆယ်စုနှစ်တခုကြာ ဖွံ့ဖြိုးတိုးတက်ပြီး အကြိုဒီမိုကရေစီစနစ် ဖြစ်ပေါ်လာပြီးနောက် ၂၀၂၁ ခုနှစ်မှာ စစ်တပ်အာဏာသိမ်းခံရပြီး စီးပွားရေးပျက်စီးသွားခဲ့ကာ လူဦးရေ ၅၃ သန်းရှိတဲ့ ဆင်းရဲနွမ်းပါးတဲ့ မြန်မာနိုင်ငံအတွက် ငလျင်ဟာ နောက်ဆုံးထိုးနှက်ချက်လည်း ဖြစ်ပါတယ်။

Source : Reuters