မြန်မာ့ငလျင်ဘေးအတွက် ဩစတြေးလျနိုင်ငံက လူသားချင်းစာနာထောက်ထားမှုဆိုင်ရာ အကူအညီ ဒေါ်လာ ၇ သန်း ထပ်မံပေးအပ်သွားမယ်လို့ နိုင်ငံခြားရေးဝန်ကြီးဌာနက ဧပြီ ၂ ရက် ဒီကနေ့မှာ ထုတ်ပြန်လိုက်ပါတယ်။
အခုထပ်မံပေးအပ်သွားမယ့် အကူအညီတွေထဲမှာတော့ အစားအစာ၊ ရေနဲ့ သန့်ရှင်းရေး၊အရေးပေါ်ကျန်းမာရေးနဲ့ ပညာရေးတို့အတွက် သြစတြေးလျ NGO တွေနဲ့ ဒေသတွင်း မိတ်ဖက်အဖွဲ့အစည်းတွေကတဆင့် ဒေါ်လာ ၃ သန်းခွဲ၊ မိတ်ဖက်အဖွဲ့အစည်းတွေရဲ့ အရေးပေါ် တောင်းခံမှုအတွက် ဒေါ်လာ ၅ သိန်းနဲ့ အာဆီယံရဲ့ ဘေးအန္တရာယ် စီမံခန့်ခွဲမှုဆိုင်ရာ လူသားချင်းစာနာမှုအကူအညီဆိုင်ရာ ညှိနှိုင်းရေးဗဟိုဌာန (AHA CENTRE) က တဆင့် အရေးပေါ်ကယ်ဆယ်ရေးပစ္စည်းတွေအတွက် ဒေါ်လာ ၃ သန်းစီ ပါဝင်နေတာပါ။
ဒါ့အပြင် ဩစတြေးလျအစိုးရအနေနဲ့ ပြီးခဲ့တဲ့ မတ် ၃၀ ရက်တုန်းကလည်း မြန်မာမှာ လူသားချင်းစာနာမှုလုပ်ငန်းတွေ အလျင်အမြန်လုပ်ဆောင်နိုင်ဖို့အတွက် ကနဦးအကူ အညီ ဒေါ်လာ ၂ သန်းကို အပြည်ပြည်ဆိုင်ရာကြက်ခြေနီကော်မတီ (ICRC) ကတဆင့် ပေး အပ်ထားခဲ့တာ ဖြစ်ပါတယ်။
ဩစတြေးလျအနေနဲ့ မြန်မာစစ်အုပ်စုဆီ ဘယ်အကူအညီမှ တိုက်ရိုက်ပေးအပ်မှာ မဟုတ်သလို သူတို့ရဲ့အကူအညီတွေဟာ စစ်ကောင်စီကို တရားဝင်မှုမဖြစ်စေဖို့ အသေအချာ ကြိုတင် ပြင်ဆောင်ရွက်နေတယ်လို့လည်း နိုင်ငံခြားရေးဝန်ကြီးနဲ့ နိုင်ငံတကာ ဖွံ့ဖြိုးရေးနဲ့ ပစိဖိတ်ရေးရာဝန်ကြီးတို့ရဲ့ ပူးတွဲထုတ်ပြန်ချက်မှာ ဖော်ပြပါတယ်။
ဩစတြေးလျရဲ့ အကူအညီဟာ ICRC နဲ့ အရေးပေါ် ကျန်းမာရေးဆိုင်ရာ အကူအညီတွေ ပေးအပ်ခြင်းအပါအဝင် အသက်ကယ်ဆယ်ရေး ပံ့ပိုးမှုတွေကို ချက်ချင်းလုပ်ဆောင်ဖို့ အထောက်အကူဖြစ်စေနိုင်မယ်လို့ ဆိုပါတယ်။
မတ် ၂၈ ရက်က စစ်ကိုင်းမြို့အနီးကို ဗဟိုပြုပြီး လှုပ်ခတ်ခဲ့တဲ့ အင်အား ၇ ဒသမ ၇ ရစ်ချ်တာစကေးရှိတဲ့ ငလျင်ကြောင့် ထိခိုက်သေဆုံးသူ စုစုပေါင်း ၃,၇၅၆ ယောက်အထိ ရှိနေပြီလို့ ဧပြီ ၁ ရက် ည ၈ နာရီအထိ DVB က ကောက်ယူရရှိတဲ့ စာရင်းတွေအရ သိရပါတယ်။
ငလျင်ကြောင့် နေပြည်တော် အပါအဝင် မန္တလေးတိုင်း၊ စစ်ကိုင်းတိုင်းနဲ့ ရှမ်းပြည်နယ် တောင်ပိုင်းမှာ သေဆုံးသူ များခဲ့ပြီး လူနေအိမ်တွေ၊ လမ်းတံတား အဆောက်အအုံတွေ၊ စေတီပုထိုးနဲ့ ဘာသာရေး အဆောက်အုံတွေ အများအပြား ထိခိုက်ပျက်စီးသွားခဲ့ပါ တယ်။
