မြန်မာစစ်တပ်ဟာ ငလျင်ဒဏ်သင့်ဒေသတွေဆီ အကူအညီတွေမရောက်အောင် တားဆီး ပိတ်ဆို့နေသလို လေကြောင်းတိုက်ခိုက်မှုတွေလည်း ဆက်လက် လုပ်ဆောင်နေတာကြောင့် နိုင်ငံတကာရဲ့ ဝေဖန်မှုတွေနဲ့ ရင်ဆိုင်နေရပါတယ်။

မြန်မာပြည်အလယ်ပိုင်းမှာ ပြင်းအား  ရစ်ချ်တာစကေး ၇ ဒသမ ၇ ရှိတဲ့ ငလျင်ကြီး လှုပ်ခတ်ပြီးနောက် လူသားချင်းစာနာမှု အကူအညီတွေကို အကန့်အသတ်မရှိ ဝင်ရောက်ခွင့်ပေးဖို့ နိုင်ငံတကာအဖွဲ့အစည်းတွေက တောင်းဆိုထားပါတယ်။

အဲဒီ ငလျင်ဒဏ်သင့်ဒေသတွေမှာ သန့်ရှင်းတဲ့ရေနဲ့ စားနပ်ရိက္ခာစတဲ့ အခြေခံလိုအပ်ချက်တွေ ရှိနေတာ ဖြစ်ပါတယ်။

ငလျင်ဗဟိုချက်ဖြစ်တဲ့ မန္တလေးနဲ့ စစ်ကိုင်းမှာ စစ်ကောင်စီက အရေးပေါ်အကူအညီတွေကို ဝင်ရောက်ခွင့်မပေးဘူးဆိုပြီး အချိတ်အဆက်လုပ်ပေးနေသူ ဆရာဝန် ၂ ယောက်က ပြောပါတယ်။

ဒေါက်တာနန်းဝင်းက “အကူအညီပေးရေးပစ္စည်းတချို့နဲ့ အများစုဟာ လိုအပ်နေသူတွေဆီ ရောက်မသွားပါဘူး။ မန္တလေးက တချို့နေရာတွေမှာဆိုရင် အကူအညီ ရောက်ကို မရောက်လာတာပါ။ စစ်ကောင်စီက ဒီပစ္စည်းတွေကို သိမ်းယူသွားပါတယ်” လို့ မှတ်ချက်ပြုပါတယ်။

ဒေါက်တာနန်းဝင်းရဲ့ လုပ်ဖော်ကိုင်ဖက် ဆရာဝန်တယောက်ကလည်း ထောက်ပံ့ငွေ ဒေါ်လာ ၁,၀၀၀ ရရှိကြောင်း စာရွက်စာတမ်းတွေမှာ လက်မှတ်ထိုးရပေမဲ့ တကယ်တမ်းရလာတာ ဒေါ်လာ ၁၀၀ သာ ဖြစ်တယ်လို့ မြေပြင်အခြေအနေကို ပြောသွားပါတယ်။

အခုလိုမျိုး ကြားထဲက ဖြတ်ယူထားတဲ့ ပစ္စည်းတွေဟာ မှောင်ခိုဈေးကွက်ထဲကို ရောက်သွားနိုင်တယ်ဆိုပြီး ဖြည့်စွက်ပြောပါတယ်။

စစ်ကိုင်းရောက် ကယ်ဆယ်ရေးအဖွဲ့ဝင်တယောက်ကလည်း “မန္တလေးမှာ အထောက်အပံ့ ပစ္စည်းတွေ ပို့ဖို့ ကြိုးစားတဲ့အခါ စစ်ကောင်စီအနေနဲ့  ခွင့်ပြုချက်မပေးပါဘူး။ မနေ့ကတင် အဲဒီပစ္စည်းအားလုံးရဲ့ တဝက်ကို သိမ်းယူသွားတယ်” လို့ ဆိုပါတယ်။

အထူးသဖြင့် စစ်ကိုင်းနဲ့ မကွေးလိုမျိုး စစ်တပ်က အပြည့်အဝ ထိန်းချုပ်နိုင်စွမ်းမရှိတဲ့ နေရာတွေမှာ အကူအညီပေးရေးပစ္စည်းနဲ့ ကယ်ဆယ်ရေးအဖွဲ့ဝင်တွေကို တားဆီးလေ့ရှိကြောင်း သိရပါတယ်။

ဒါဟာ မြန်မာစစ်တပ်ဘက်က တော်လှန်ရေးတပ်ဖွဲ့တွေရဲ့ လက်နက်တွေကို အကူအညီပေးရေး ပစ္စည်းအဖြစ် ပုံဖျက်ကာ သယ်ဆောင်လာမှာ စိုးရိမ်မှုရှိတဲ့အလျောက် ကယ်ဆယ်ရေးအဖွဲ့တွေ အပေါ် အခုလိုမျိုး အသေးစိတ် စစ်ဆေးနေတာပါ။

စစ်ကောင်စီပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်း ကတော့ စွပ်စွဲချက်တွေကို တုံ့ပြန်တာမျိုး မရှိသေးပါဘူး။

လက်ရှိအချိန်မှာ စစ်ကောင်စီက အဓိကမြို့ကြီးတချို့ အပါအဝင် နယ်မြေစုစုပေါင်း ၃၀ ရာခိုင်နှုန်း အောက်ကိုသာ ထိန်းချုပ်ထားနိုင်တာ ဖြစ်ပါတယ်။

လွန်ခဲ့တဲ့ တနင်္လာနေ့အတွင်း မန္တလေးတိုင်းဒေသကြီး စဉ့်ကူးမြို့နဲ့ ရှမ်းပြည်နယ် နောင်ချိုမြို့တွေမှာလည်း စစ်ကောင်စီရဲ့ လေကြောင်းတိုက်ခိုက်မှုတွေ ရှိခဲ့ပါသေးတယ်။

ကုလသမဂ္ဂရဲ့ မြန်မာနိုင်ငံဆိုင်ရာ အထူးကိုယ်စားလှယ် တွမ် အန်ဒရူးစ် ကတော့ “စစ်တပ်ဟာ လူတွေကိုသတ်နေတာ ရပ်ပြီး ကယ်ဆယ်ဖို့အတွက် အာရုံစိုက်သင့်ကြောင်း” ဝေဖန်ပြောဆိုထားပါတယ်။

မြန်မာနိုင်ငံဆိုင်ရာ အမေရိကန်သံအမတ်ဟောင်း စကော့မာစီရယ်လ်ကလည်း စစ်တပ်ဟာ ဒုက္ခရောက်နေတဲ့ ပြည်သူတွေကို ကူညီတဲ့နေရာမှာ နာမည်ပျက်ရှိတယ်ဆိုပြီး ပြောကြားပါတယ်။

မြန်မာနိုင်ငံငလျင်ဘေး ကူညီကယ်ဆယ်ရေးအတွက် နိုင်ငံတကာက ဝိုင်းဝန်းကူညီနေကြတာဖြစ်ပြီး တရုတ်၊ အိန္ဒိယ၊ ရုရှား၊ ထိုင်း၊ မလေးရှား၊ ဖိလစ်ပိုင်၊ ဂျပန် စတဲ့ နိုင်ငံပေါင်း ၁၅ နိုင်ငံက လေယာဉ် ၅၃ စီး၊ ကယ်ဆယ်ရေးဝန်ထမ်းပေါင်း ၁,၅၁၉ ယောက်၊ ထောက်ပံ့ရေးပစ္စည်း ၃၅၄ တန်ကျော်နဲ့ ကယ်ဆယ်ရေးပစ္စည်း ၄၉၅ တန်ကျော် ရောက်ရှိနေတယ်လို့လည်း စစ်ကောင်စီ ပြောကြားချက်အရ သိရပါတယ်။

စစ်ခေါင်းဆောင် မင်းအောင်လှိုင်ကတော့ ပြီးခဲ့တဲ့အင်္ဂါနေ့အထိ ငလျင်ကြောင့်သေဆုံးသူ ၃,၀၀၀ ကျော်ရှိလာနိုင်ကြောင်းနဲ့ နောက်ထပ် ၄၄၁ ယောက် ပျောက်ဆုံးနေသေးကြောင်းပြောပါတယ်။

DVB ရဲ့ ဧပြီလ ၂ ရက် နေ့လယ် ၁ နာရီအထိ ကောက်ယူရရှိထားတဲ့ စာရင်းတွေအရကတော့ ငလျင်ကြောင့် လူပေါင်း ၃၈၄၈ ယောက်သေဆုံးပြီး  ဒဏ်ရာရသူ ၄၇၂၅ ယောက်နဲ့ ပျောက်ဆုံးနေသူ ၇၀၈ ယောက်ရှိနေပြီ ဖြစ်ပါတယ်။

Source : Reuters