အင်အားပြင်း မြေငလျင်ကြောင့် ထိခိုက်ခဲ့တဲ့ မြန်မာပြည်သူတွေရဲ့ အရေးပေါ်နဲ့ လူသားချင်းစာနာထောက်ထားမှုဆိုင်ရာ လိုအပ်ချက်တွေကို ပံ့ပိုးကူညီဖို့ အမေရိကန်ဒေါ်လာ ၃ သန်းထောက်ပံ့မယ်လို့ အာရှဖွံ့ဖြိုးရေးဘဏ် (ADB) က ထုတ်ပြန်ပါတယ်။

ထောက်ပံ့ငွေကို ADB ရဲ့ ဒါရိုက်တာဘုတ်အဖွဲက အမြန်ဆုံး အတည်ပြုဖို့ ပြင်ဆင်နေပြီး ကုလသမဂ္ဂကမ္ဘာ့စားနပ်ရိက္ခာအစီအစဉ် (WFP) ကနေတဆင့် ပံ့ပိုးပေးမှာ ဖြစ်ပါတယ်။

ဒီကနေ တဆင့် သောက်သုံးရေ၊ ဆေးဝါးနဲ့ ယာယီတဲတွေလို မရှိမဖြစ်လိုအပ်တဲ့ ပစ္စည်းတွေ ဝယ်ယူဖို့ ဆောင်ရွက်ရာမှာ အသုံးချမယ်လို့လည်း သိရပါတယ်။

ငလျင်ဟာ မြန်မာနိုင်ငံရဲ့ လက်ရှိ လူသားချင်းစာနာထောက်ထားမှုဆိုင်ရာ အကျပ်အတည်းကို ပိုမိုပြင်းထန်စေပြီး ပြည်သူတွေ ရင်ဆိုင်နေရတဲ့ လက်ရှိစိန်ခေါ်မှုတွေကို ပိုမိုအရေးပေါ် ဖြစ်စေခဲ့တယ်လို့  ထုတ်ပြန်ချက်မှာ ဖော်ပြထားပါတယ်။

မတ် ၂၈ ရက်က စစ်ကိုင်းမြို့အနီးကို ဗဟိုပြုပြီး လှုပ်ခတ်ခဲ့တဲ့ အင်အား ၇ ဒသမ ၇ ရစ်ချ်တာစကေးရှိတဲ့ ငလျင်ကြောင့် ထိခိုက်သေဆုံးသူ စုစုပေါင်း ၃,၇၅၆ ယောက်အထိရှိနေပြီလို့ ဧပြီ ၁ ရက် ည ၈ နာရီအထိ  DVB က ကောက်ယူရရှိတဲ့ စာရင်းတွေအရ သိရပါတယ်။