မတ် ၂၈ ရက်က လှုပ်ခတ်ခဲ့တဲ့ အင်အားပြင်းငလျင်ကြောင့် ထိခိုက်ပျက်စီးခဲ့တဲ့ အမျိုးသားညီညွတ်ရေးအစိုးရရဲ့ စိုးမိုးထိန်းချုပ်နယ်မြေတွေမှာ NUG အနေနဲ့ ကူညီကယ်ဆယ်ရေးတွေကို အားစိုက်လုပ်ဆောင်နိုင်ခဲ့ပေမဲ့ စစ်ကောင်စီ စိုးမိုးနယ်မြေတွေမှာတော့ ဝင်ရောက် မကူညီနိုင်တဲ့အတွက် ဝမ်းနည်းကြောင်းနဲ့ ပြည်သူတွေကို တောင်းပန်လိုက်ပါတယ်။

ဧပြီ ၂ ရက်မှာ ထုတ်ပြန်တဲ့ ငလျင်ဘေး မြန်မာနိုင်ငံလုံးဆိုင်ရာ ပြည်သူ့ဝမ်းနည်းကြေကွဲမှုနဲ့ နှစ်သိမ့်အားပေးမှု ရက်သတ္တပတ် ကြေညာခြင်း ထုတ်ပြန်ချက်မှာ ရေးသားဖော်ပြထားတာပါ။ 

“အမျိုးသားညီညွတ်ရေးအစိုးရအနေဖြင့် မိမိတို့၏ စိုးမိုးနယ်မြေများတွင် ငလျင်ဘေးဒဏ်သင့်လူထုကို ၇၂ နာရီအတွင်း ကူညီကယ်ဆယ်မှုများ အပြည့်အဝအားစိုက် လုပ်နိုင်ခဲ့သော်လည်း အကြမ်းဖက်စစ်ကောင်စီ စိုးမိုးဒေသများတွင် ကိုယ်ထိလက်ရောက် ဝင်ရောက်မကူညီနိုင်ခဲ့သည့်အတွက် များစွာ ဝမ်းနည်း စိတ်မကောင်းဖြစ်ရပြီး ငလျင်ဘေးသင့် ပြည်သူလူထုကို လေးနက်စွာ တောင်းပန်အပ်ပါသည်”လို့ ထုတ်ပြန်ချက်မှာ ဖော်ပြပါတယ်။ 

NUG အနေနဲ့ လာမယ့် ဧပြီ ၁၃ ရက်ကနေ ၂၀ ရက်အထိကို ပူဆွေးမှုတွေအတွက် ပြည်သူအချင်းချင်း အားပေးနှစ်သိမ့်ဖို့ နိုင်ငံလုံးဆိုင်ရာ ပြည်သူ့ဝမ်းနည်းကြေကွဲမှုနဲ့ နှစ်သိမ့်အားပေးမှု ရက်သတ္တပတ်အဖြစ် သတ်မှတ်ကြောင်းလည်း ပါရှိပါတယ်။

ငလျင်ဒဏ်ကြောင့် ထိခိုက်ခံစားမှုတွေအပြင်ကို စစ်ကောင်စီရဲ့ ညှဉ်းပန်းခံနေတဲ့ပြည်သူတွေအတွက် အတူတကွရပ်တည်ကြောင်း၊ အသက်ဆုံးပါးသွားတဲ့ ပြည်သူတွေအတွက် အောက်မေ့သတိရ ဆုတောင်းပွဲပြုလုပ်ပြီး ဘာသာအလိုက် ကုသိုလ်ကောင်းမှုတွေ ပြုလုပ်ဖို့နဲ့ နိုင်ငံတကာက ဝမ်းနည်းနှစ်သိမ့်ကြောင်းတွေကို အတူတကွလုပ်ဆောင်းဖို့တွေကိုပါ တိုက်တွန်း နှိုးဆော်ထားပါတယ်။