
မြန်မာငလျင်ဘေးမှာ အသက်ရှင်ကျန်ရစ်သူတွေကို ရှာဖွေချိန် ကုန်ဆုံးဖို့ နီးကပ်လာပြီဖြစ်ကြောင်း ကုလသမဂ္ဂက သတိပေးခဲ့ပါတယ်။
မတ် ၂၈ ရက်က လှုပ်ခတ်ခဲ့တဲ့ ငလျင်ကြောင့် အပျက်အစီးတွေကြားမှာ ပိတ်မိသူတွေကို ရှာဖွေကယ်ဆယ်မှုတွေ လုပ်နေပြီး ငလျင်လှုပ်တာ ၆ ရက်မြောက်နေ့ ဖြစ်တာကြောင့် ပိတ်မိနေသူတွေ အသက်ရှင်သန်ခွင့် နည်းပါးလာပြီး သေဆုံးမှုနှုန်း တိုးလာဖွယ်ရှိပါတယ်။
မတ် ၂၈ ရက် နေ့လယ်က လှုပ်ခတ်ခဲ့တဲ့ ငလျင်ဟာ အရှေ့တောင်အာရှနိုင်ငံတွေအနက် ၁၀ စုနှစ်အတွင်း အပြင်းထန်ဆုံးဖြစ်ပြီး ရှေးဟောင်းဘုရားတွေနဲ့ အဆောက်အအုံတွေ ပြိုပျက်ခဲ့ရပါတယ်။
ငလျင်ကြောင့် မြန်မာနိုင်ငံရှိ ဆေးရုံတွေမှာ လူနာတွေ များပြားနေပြီး ကယ်ဆယ်ရေးလုပ်ငန်းတွေလည်း ဟန့်တားခံနေရကြောင်း ကုလသမဂ္ဂအေဂျင်စီက ပြောပါတယ်။
မြန်မာနိုင်ငံအလယ်ပိုင်းရှိ ငလျင်ထိခိုက်ခံရတဲ့ အဆိုးရွားဆုံး နေရာတွေကို သွားရောက်ခဲ့တဲ့ ကုလသမဂ္ဂ ကလေးများရန်ပုံငွေအဖွဲ့ (ယူနီဆက်ဖ်) တာဝန်ရှိသူ ဂျူလီယာရီးစ်က မြန်မာနိုင်ငံရဲ့ ဆက်သွယ်ရေးတွေအားလုံးက ပျက်စီးခဲ့ပြီး အပျက်အစီးတွေနဲ့ ကြီးမားတဲ့ စိတ်ဒဏ်ရာ ရနေကြောင်း ပြောပါတယ်။
ဂျီလီယာရီးစ်က “ပြဿနာတွေက မပြီးသေးပါဘူး။ စိတ်ဒဏ်ရာရမှုတွေက ဆက်နေပါတယ်။ ငလျင်ကြောင့် ရှာဖွေမှုတွေ ဆက်လုပ်နေပြီး ကယ်ဆယ်ရေးတွေလည်း ဆက်လုပ်နေပါတယ်။ သေဆုံးသူတွေကို အုတ်ပုံတွေထဲကနေ ဆွဲထုတ်နေရတယ်။ ဒီနေရာတွေမှာ ကယ်ဆယ်ရေးတွေ အများကြီးလိုပါတယ်။ အပျက်အစီးတွေကြားမှာ ပိတ်မိနေသူတွေကို ရှာဖွေကယ်တင်နိုင်မယ့်အချိန် ကုန်ဆုံးလာပါပြီ” လို့ ပြောပါတယ်။
မတ် ၂၈ ရက်က စစ်ကိုင်းမြို့အနီးကို ဗဟိုပြုပြီး လှုပ်ခတ်ခဲ့တဲ့ အင်အား ၇ ဒသမ ၇ ရစ်ချ်တာစကေး ရှိတဲ့ ငလျင်ကြောင့် ထိခိုက်သေဆုံးသူ စုစုပေါင်း ၃,၇၅၆ ယောက်အထိ ရှိနေပြီလို့ ဧပြီ ၁ ရက် ည ၈ နာရီအထိ DVB က ကောက်ယူရရှိတဲ့ စာရင်းတွေအရ သိရပါတယ်။
ကုလသမဂ္ဂ ပြောရေးဆိုခွင့်ရှိသူ ဒူဂျာရစ်ကလည်း မိုးရာသီမတိုင်မီ ငလျင်ဘေးသင့် မြန်မာနိုင်ငံကို ကူညီမှုတွေပြုလုပ်ဖို့ ကမ္ဘာ့အဖွဲ့အစည်းတွေကို တိုက်တွန်းခဲ့ပါတယ်။
“မြန်မာနိုင်ငံမှာ အကူညီတွေ ရောက်ရှိဖို့ ကျနော်တို့ အလေးအနက် လုပ်ဆောင်နေပါတယ်။ ဒီအကူအညီတွေကိုလည်း မိုးရာသီမတိုင်မီ ကူညီနိုင်ဖို့ ကျနော်တို့ လုပ်ဆောင်ရမှာပါ။ ဒီလိုမှ မဟုတ်ဘူးဆိုရင် ဆိုးရွားတဲ့ အခြေအနေတွေ ပိုပြီး ဆိုးရွားလာမှာပါ။”
ကုလသမဂ္ဂ လူသားချင်းစာနာမှုကိုယ်စားလှယ်ရဲ့ ငလျင်လှုပ်ခတ်တဲ့နေရာကို ၂ ရက်တာ လာရောက်တဲ့ အတွေ့အကြုံအရ မြန်မာနိုင်ငံမှာ သောက်ရေ၊ တကိုယ်ရေသုံးပစ္စည်းတွေ၊ အစားအစာ၊ အမိုးအကာ၊ ဆေးဝါးတို့ လိုအပ်တယ်လို့ ဖော်ပြပါတယ်။
ငလျင်ဘေးမတိုင်မီ မြန်မာနိုင်ငံမှာ ဖြစ်ပွားနေတဲ့ စစ်ပွဲတွေကြောင့် လူ ၃ သန်း နေရပ်စွန့်ပြေးနေရပြီး လက်နက်ကိုင်တွေအားလုံး ချက်ချင်း အပစ်အခတ်ရပ်စဲဖို့ ကုလသမဂ္ဂ မြန်မာနိုင်ငံ အထူးသံတမန် ဂျူလီဘစ်ရှော့က တောင်းဆိုခဲ့ပါတယ်။
“စစ်ဆင်ရေးတွေ ဆက်လုပ်နေတာက ဘေးအန္တရာယ်ခံနေရတဲ့ ဒေသတွေက လူတွေရဲ့ အသက်တွေကို ပိုပြီး ဆုံးရှုံးစေပါတယ်။”
Source : Reuters