ငလျင်ဘေးသင့် မြန်မာပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာတဲ့ တရုတ်နိုင်ငံ ကြက်ခြေနီယာဉ်တန်း ရပ်မပေးတဲ့အတွက် စစ်ကောင်စီတပ်က မိုးပေါ်ထောင်ပြီး သေနတ် ၃ ချက် ပစ်ဖောက်တားဆီးခဲ့တယ်လို့ စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြောပါတယ်။

ဧပြီ ၁ ရက် ည ၉ နာရီကျော်က နောင်ချိုမြို့နယ်၊ အုမ္မတီးကျေးရွာနားမှာ တရုတ်ကြက်ခြေနီယာဉ်တန်း ပစ်ခတ်ခံရတာနဲ့ ပတ်သက်ပြီး မီဒီယာတွေရဲ့ မေးမြန်းချက်ကို စစ်ကောင်စီ ပြောခွင့်ရသူက တုံ့ပြန်လိုက်တာပါ။

ဗိုလ်ချုပ်ဇော်မင်းထွန်းက “နောင်ချိုဘက်ကနေပြီး ယာဉ်တန်းပေါ့ ၉ စီးလောက်ပါတယ်လို့ ပြောပါတယ်။ လာတာကို တွေ့ရပါတယ်။ အုမ္မတီးရွာမှာ ကျနော်တို့ တပ်မတော် လုံခြုံရေးအဖွဲ့ ရှိပါတယ်။ တပ်မတော် လုံခြုံရေးအဖွဲ့အနေနဲ့ ဒီယာဉ်တန်းကို တွေ့တဲ့အခါမှာ တားဆီးပါတယ်။ တားဆီးလို့ မရပါဘူး။ ဒါ မီတာ ၁၀၀ လောက်၊ မီတာ ၂၀၀ လောက် အကွာလောက်က မီးထိုးပြီး တားဆီးတယ်၊ တားဆီးလို့ မရဘူး။ မီတာ ၁၀၀ လောက် အကွာမှာတော့ ကျနော်တို့ မိုးပေါ်ထောင်ပြီး သေနတ် ၃ ချက် ပစ်ဖောက်ခဲ့တယ်လို့ သိရပါတယ်။ ဒါနဲ့ နောင်ချိုဘက်ကို ပြန်သွားတယ်လို့ အကြမ်းဖျဉ်းသိရပါတယ်” လို့ ပြောပါတယ်။

တရုတ်ကြက်ခြေနီယာဉ်တန်း အနေနဲ့ မြန်မာနိုင်ငံကိုရော သက်ဆိုင်ရာသံရုံး၊ စစ်သံရုံးကိုရော အကြောင်းကြားထားတာ မရှိကြောင်းနဲ့ ဒီပစ်ခတ်မှုဖြစ်စဉ်နဲ့ ပတ်သက်ပြီး တပ်မတော်အနေနဲ့ တာဝန်ရှိသူတွေအနေနဲ့ စုံစမ်းမေးမြန်းနေတယ်လို့လည်း ဗိုလ်ချုပ်ဇော်မင်းထွန်းက ပြောပါတယ်။

ငလျင်ဒဏ်သင့် ပြည်သူတွေအတွက် ထောက်ပံ့ရေးပစ္စည်းတွေ သယ်ဆောင်လာပြီး တရုတ်နယ်စပ် ရွှေလီမြို့ကနေတဆင့် မန္တလေးမြို့ကို ထွက်ခွာလာတဲ့ တရုတ်နိုင်ငံ ကြက်ခြေနီအသင်း ယာဉ်တန်းတွေကို မနေ့ည ၉ နာရီကျော်က နောင်ချိုမြို့နယ် အုမ္မတီးကျေးရွာနားမှာ စစ်ကောင်စီတပ်က အသင့်စောင့်ပြီး ပစ်ခတ်ခဲ့တာလို့ TNLA က ထုတ်ပြန်ထားပါတယ်။

အခုလို သွားရောက်ကူညီဖို့ စစ်ကောင်စီကို သတင်းပို့ထားခဲ့ပြီး ဖြစ်ပေမဲ့ လမ်းမှာ အခုလို ပစ်ခတ်ခံရတာကြောင့် ယာဉ်တန်းတွေအားလုံး နောင်ချိုမြို့ဘက်ကို ပြန်လည် ဆုတ်ခွာလာခဲ့ရတယ်လို့ ဆိုပါတယ်။

အဆိုပါယာဉ်တန်းတွေကို တအာင်းအမျိုးသားလွတ်မြောက်ရေးတပ်မတော် (TNLA) က ကာကွယ်စောင့်ရှောက်ပေးထားပြီး လိုရာခရီး ဆက်လက်ပို့ဆောင်ပေးသွားမယ်လို့လည်း TNLA ရဲ့ ထုတ်ပြန်ချက်အရ သိရပါတယ်။မြန်မာနိုင်ငံမှာ လူတွေထောင်ချီသေဆုံးပြီး အပျက်အစီးများခဲ့တဲ့ ငလျင်ဘေး ကူညီကယ်ဆယ်ရေး အတွက် နိုင်ငံတကာက ဝိုင်းဝန်းကူညီနေကြတာဖြစ်ပြီး တရုတ်၊ အိန္ဒိယ၊ ရုရှား၊ ထိုင်း၊ မလေးရှား၊ ဖိလစ်ပိုင်၊ ဂျပန် စတဲ့ နိုင်ငံပေါင်း ၁၅ နိုင်ငံက လေယာဉ် ၅၃ စီး ကယ်ဆယ်ရေးဝန်ထမ်းပေါင်း ၁,၅၁၉ ယောက် ရောက်ရှိနေတယ်လို့လည်း စစ်ကောင်စီ ပြောကြားချက်အရ သိရပါတယ်။