ရှမ်းပြည်နယ်မြောက်ပိုင်း၊ ကွတ်ခိုင်မြို့မှာ တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) နဲ့ ကိုးကန့်တပ်ဖွဲ့ (MNDAA) တို့ ခိုက်ရန်ဖြစ်ပွားခဲ့တဲ့ကိစ္စ ပြေလည်မှုရသွားပြီလို့ TNLA က ထုတ်ပြန်ပါတယ်။
ဧပြီ ၁ ရက် မနက် ၁၁ နာရီဝန်းကျင်က ကွတ်ခိုင်မြို့မဈေးမှာ MNDAA က မဏ္ဍပ်ဖွင့်လှစ်ကာ ငလျင်ဒဏ်အတွက် အလှူငွေကောက်ခံနေချိန် TNLA တပ်သားက ရောက်ရှိလာပြီး နေရာမှ ထွက်ခွာဖို့ ပြောဆိုခဲ့တာကြောင့် ခိုက်ရန်ဖြစ်ပွားခဲ့တာပါ။
မဟာမိတ် ကိုးကန့်တပ်ဖွဲ့ဝင်တွေဟာ အင်အားအလုံးအရင်းနဲ့ ပြည်ထောင်စုကားလမ်းမကို ပိတ်ဆို့ပြီး ဖြတ်သန်းသွားလာနေတဲ့ ကားတွေကို ရပ်ပြီး အလှူငွေကောက်ခံရာ တအာင်းပြည်ရဲတပ်ဖွဲ့ ယာဉ်ထိန်းဌာန တာဝန်ရှိသူတယောက်က လူကြီးခရီးစဉ်ရှိလို့ ခေတ္တလမ်းဖွင့်ပေးဖို့ သွားရောက်ညှိနှိုင်းပြောဆိုရာက ဘာသာစကား မပေါက်တဲ့အတွက် နှစ်ဖက်တပ်ဖွဲ့အကြား အနည်းငယ် အငြင်းအခုံ ဖြစ်ပွားခဲ့ရတာလို့ သိရပါတယ်။
လက်ရှိမှာ နှစ်ဖက်တာဝန်ရှိသူတွေက ညှိနှိုင်းဖြေရှင်းရာ ပြေလည်မှုရရှိသွားပြီး တအာင်းဒေသ မြို့နယ်တိုင်းမှာ ပြည်သူလူထုတွေ တတ်အားသမျှ ငလျင်ဘေးသင့်လူထုကို ကူညီဖေးမနိုင်ဖို့ တက်ကြွစွာ ဆောင်ရွက်နေကြတယ်လို့ ဆိုပါတယ်။
