နေပြည်တော်မှာ စစ်မှုထမ်းတပ်သားအဖြစ် စုဆောင်းခံရပြီး သင်တန်းတက်နေရတဲ့ လူငယ် အယောက် ၃၀ လောက်  ငလျင်ဒဏ်ကြောင့်  ထိခိုက်ဒဏ်ရာရရှိခဲ့တယ်လို့ နီးစပ်သူတွေဆီကနေ သိရပါတယ်။

မတ် ၂၈ ရက်က စစ်ကိုင်းကို ဗဟိုပြုလှုပ်ခတ်ခဲ့တဲ့ အင်အားပြင်း ငလျင်ဒဏ်ကြောင့် နေပြည်တော် တပ်ကုန်းနဲ့ ပျဉ်းမနားမြို့နယ်တွေမှာ စစ်မှုထမ်း အပတ်စဉ် ၁၂ တက်နေရတဲ့ လူငယ်တွေ ထိခိုက်ဒဏ်ရာရရှိခဲ့တာ ဖြစ်ပါတယ်။

စစ်မှုထမ်းလူငယ်တွေနဲ့နီးစပ်သူက “ငလျင်လှုပ်တဲ့အချိန် အရာရှိတွေက စစ်မှုထမ်းတပ်သားတွေကို ထွက်ပြေးမှာစိုးပြီး ငလျင်ဒဏ်ခံရတဲ့ အဆောက်အအုံတွေထဲကနေ ထွက်ပြေးမခံတော့ အခုလို ဒဏ်ရာတာ” လို့ပြောပါတယ်။

ငလျင်ဒဏ်ကြောင့် စစ်မှုထမ်း သင်တန်းတက်နေတဲ့ လူငယ် အယောက် ၃၀ ထက်မနည်း ထိခိုက်ဒဏ်ရာရရှိခဲ့ပြီး လက်ရှိ စစ်သင်တန်းကျောင်းမှာပဲ ဆေးကုသပေးနေတယ်လို့ ဆိုပါတယ်။

နေပြည်တော်က ဝန်ထမ်းတယောက်က “အသေးစား ထိခိုက်တဲ့သူတွေပဲ များပါတယ်။ ဒဏ်ရာရရှိတဲ့သူတွေပဲရှိတာ၊ သေဆုံးသူ မရှိဘူး။ သင်တန်းကျောင်းတွေအပါအဝင် စစ်ရုံးချုပ်တွေ၊ လွှတ်တော်အဆောက်အအုံတွေ ပျက်စီးထိခိုက်ခဲ့ပါတယ်”လို့  ပြောပါတယ်။

စစ်မှုထမ်းတပ်သားတွေ ငလျင်ဒဏ်ကြောင့် ထိခိုက်တဲ့ အခြေအနေနဲ့ ပတ်သက်လို့ စစ်ကောင်စီက သတင်းအမှောင်ချထားခိုင်းပြီး ဝန်ထမ်းတွေ ထိခိုက်တာ၊ သေဆုံးတာကိုလည်း သတင်းဖုံးကွယ်ထားတယ်လို့ ဆိုပါတယ်။

ငလျင်ဒဏ်ကြောင့် နေပြည်တော်မှာရှိတဲ့ ပြည်ထောင်စုလွှတ်တော်၊ ပြည်သူ့လွှတ်တော်၊ အမျိုးသားလွှတ်တော် အဆောက်အအုံတွေ ထိခိုက်ပျက်စီးခဲ့ပြီး ဆေးရုံတွေ၊ ဝန်ထမ်းအိမ်ရာတွေ၊ ဈေးတွေ၊ လမ်းတံတားတွေ ဆိုးဆိုးရွားရွား ထိခိုက်ပျက်စီးခဲ့သလို လူ့အသက်ဆုံးရှုံးမှုတွေ ရှိခဲ့ပါတယ်။

ဒါ့အပြင် စစ်ကောင်စီရုံးစိုက်ရာ နေပြည်တော်မှာ ငလျင်လှုပ်ပြီးနောက် လျှပ်စစ်မီးပြတ်တာ၊ ရေမလာတာနဲ့ လမ်းပန်းဆက်သွယ်ရေးပြတ်တောက်တာတွေ ဖြစ်နေပါတယ်။

Photo: MV