အင်အားပြင်းငလျင်ကြောင့် နေပြည်တော်ရှိ ရထားဝန်ထမ်းအိမ်ရာ အဆောက်အအုံတချို့ ပြိုကျပြီး ဝန်ထမ်းနဲ့ မိသားစုဝင် ၁၂ ယောက် သေဆုံးကာ ၁၄ ယောက် ပြင်းထန်ဒဏ်ရာရရှိခဲ့ တယ်လို့ ဝန်ထမ်းအသိုက်အဝန်းက သိရပါတယ်။
မြေငလျင်ဒဏ်ကြောင့် မြန်မာ့မီးရထားရုံးချုပ် နေပြည်တော်ရဲ့ အမှုထမ်း ၄ ထပ်တိုက် ၂၅ လုံး အနက် ၇ လုံးမှာ လုံးဝနီးပါး ပြိုကျခဲ့သလို ကျန်တဲ့တိုက်အားလုံး အက်ကွဲ ပွင့်ထွက် ထိခိုက်ခဲ့တာကြောင့် လူနေထိုင်လို့ မရတော့ဘူးလို့ ဆိုပါတယ်။
ဒါ့အပြင် အရာထမ်း လေးထပ်တိုက် ၁၇ လုံး အားလုံးနီးပါးမှာလည်း အက်ကွဲ၊ ပွင့်ထွက်သွားခဲ့လို့ လူနေထိုင်မရတော့ဘူးလို့ သိရပါတယ်။
အဲဒီအိမ်ရာတွေမှာနေထိုင်ကြတဲ့ မြန်မာ့မီးရထားအမှုထမ်း ၆၀၀ လောက်နဲ့ မိသားစုဝင် ၁၀၀၀ ကျော်ကို နေပြည်တော်ဘူတာကြီးနဲ့ ပုဗ္ဗသီရိမြို့နယ်ရှိ ကပရ ဝင်းဟောင်းမှာ ယာယီနေရာ ချထားပေးထားတယ်လို့ ဝန်ထမ်းတွေက ပြောပါတယ်။
မြန်မာ့မီးရထား၊ နေပြည်တော်ရုံးချုပ်မှ ဝန်ထမ်းတယောက်က “ထိခိုက်ပျက်စီးတာ အတော်များတယ်။ ပြိုကျတဲ့အထဲပါပြီး သေဆုံးတဲ့သူတွေ ရှိနေသေးတယ်လို့လည်း ပြောကြတယ်။ အခုက ရုံးလုပ်ငန်းတော်တော်များများလည်း ရပ်ထားရတယ်”လို့ ပြောပါတယ်။
ငလျင်ဒဏ်ကြောင့် ကျောက်တံခါး-တောင်ငူလမ်းပိုင်း လမ်းပျက်စီးမှု ၂၃ နေရာ၊ တောင်ငူ-နေပြည်တော် လမ်းပိုင်း လမ်းပျက်စီးမှု ၇ နေရာ၊ တံတားပျက်စီးမှု ၃ ခု၊ သာစည်-မန္တလေး လမ်းပိုင်း လမ်းပျက်စီးမှု ၃၂ နေရာနဲ့ တံတားပျက်စီးမှု ၈ နေရာ ရှိခဲ့လို့ ရန်ကုန်-မန္တလေး လမ်းပိုင်းတခုလုံး ရထားပြေးဆွဲနိုင်မှု မရှိသေးဘူးလို့ စစ်ကောင်စီ လက်အောက်ရှိ မြန်မာ့မီးရထားဌာနက ကနဦးထုတ် ပြန်ထားပါတယ်။
ပြင်ဆင်မှု တစိတ်တပိုင်း ပြီးစီးခဲ့ရင် ရန်ကုန်-တောင်ငူ ဖြစ်စေ၊ ရန်ကုန်-နေပြည်တော် ဖြစ်စေ ယာယီ အမြန်ဆုံး ပြန်လည်ပြေးဆွဲနိုင်ဖို့ စီစဥ်ထားသလို သင်္ကြန်ရုံးပိတ်ရက်ရှည်အမီ လမ်းပိုင်း တစိတ်တပိုင်း ပြီးစီးနိုင်ရေးအတွက် ကြိုးစားပြင်ဆင်နေကြတယ်လို့လည်း ဆိုပါတယ်။
