မတ် ၂၈ ရက် မွန်းလွဲပိုင်းက လှုပ်ခတ်သွားခဲ့တဲ့ အင်အားပြင်းငလျင်ကြောင့် ရှမ်းပြည်နယ်တောင်ပိုင်း အောင်ပန်းမြို့မှာ ဟိုတယ်-အောင်ပန်း ပြိုကျပျက်စီးသွားခဲ့ပြီး မတ် ၃၀ ရက်မှာ သေဆုံးသူ ၉ ယောက် ရှိပြီဖြစ်ကာ ဒီနေ့ထိ ကယ်ဆယ်ရေးလုပ်ငန်းတွေ လုပ်နေရတုန်းပဲလို့ ဒေသခံတွေက ပြောပါတယ်။

အောင်ပန်းမြို့ ဒေသခံတယောက်က “ဒဏ်ရာရတာက အမျိုးသမီး ၁၇ ဦး၊ အမျိုးသား ၈ ဦးနဲ့ သေဆုံးတာက ၃ ဦး၊ နောက်ထပ် ၆ ဦးက သေဆုံးတာ ထပ်တွေ့တာဆိုတော့ သေဆုံးက ၉ ဦး ဖြစ်သွားတယ်” လို့ လက်ရှိအခြေအနေကို ပြောပြပါတယ်။

အောင်ပန်းမြို့မှာ အင်အားပြင်းငလျင် လှုပ်ခတ်မှုကြောင့် တခြားအဆောက်အအုံတွေ၊ ဘုရားကျောင်းကန်တွေ၊ သာသနိက အဆောက်အအုံတွေ အနည်းငယ်ပဲ ထိခိုက်ပျက်စီးခဲ့ပြီး အဆိုးရွားဆုံး ထိခိုက်ပျက်စီးမှုကတော့ ဟိုတယ်-အောင်ပန်း တခုတည်းသာ ဖြစ်တယ်လို့ ဒေသခံတွေက ပြောပါတယ်။

အောင်ပန်းမြို့ ဒေသခံက “ကျနော်တို့ ဒီအောင်ပန်းမှာ ရှိတဲ့ လုံခြုံရေးပေးထားတာကတော့ ဌာနဆိုင်ရာ လုံခြုံရေးပေးထားတာ ရှိပါတယ်။ နောက် နာရေးကူညီမှုအသင်းတွေ ရှိမယ်။ Rescue Team တွေရှိမယ်။ ဒါပေမဲ့ နိုင်ငံခြားက ပညာရှင်တွေ ဘာတွေ ရောက်နေတယ်ဆိုပေမဲ့ အောင်ပန်းကိုတော့ လာတာ မတွေ့ဘူး။ မန္တလေး၊ နေပြည်တော်ကိုပဲ အဓိက သွားကြတာ ဖြစ်တဲ့အတွက် ဒီမှာက ဒီ rescue လုပ်တဲ့ procedure တွေ၊ technology တွေက တော်တော် အားနည်းသေးတယ်လို့ ကျနော် မြင်တယ်။ ကိုယ် တတ်စွမ်းလောက်သလေးနဲ့ပဲ လုပ်ကြတော့ အရမ်းကော်ရင်လည်း အထဲက လူတွေ ပိပြီးတော့ ထပ်ပြီးတော့ ဆိုးဆိုးရွားရွား ဖြစ်သွားမှာကိုလည်း သူတို့က စိုးရိမ်တယ်။ မကော်ပြန်တော့လည်း မပြီးပြန်ဘူး။ အမှန်တကယ်တော့ စဖြစ်တဲ့နေ့နဲ့ ဒီနေ့ဆိုရင်လေ ၂ ရက်ကျော်ကျော်လောက် ၃ ရက်လောက်ထဲ ရောက်လာပြီလေ။ အထဲမှာ တကယ်လို့ သက်ရှိထင်ရှား ရှိနေဦးမယ်ဆိုတဲ့ လူနာ ရှိနေရင်တောင် ဒီအချိန်ကတော့ မျှော်လင့်ချက် မရှိတော့ဘူးပေါ့။ နောက်ထပ် တွေ့သမျှကတော့ Dead Body ပဲ ဖြစ်ဖို့ များတယ်” လို့ ပြောပါတယ်။

အောင်ပန်းမြို့မှာ ငလျင်လှုပ်ခတ်ခဲ့တဲ့ မတ် ၂၈ ရက်နေ့ကနေ ဒီနေ့ မတ် ၃၀ ရက်ထိ လျှပ်စစ်မီးတွေလည်း ပြတ်တောက်တယ်လို့ သိရပါတယ်။