ငလျင်ဘေးဒဏ်သင့် မြန်မာပြည်သူပြည်သားတွေအတွက် ယူကေနိုင်ငံ အစိုးရက စတာလင်ပေါင် ၁၀ သန်း ကူညီထောက်ပံ့ကြောင်း မတ် ၂၉ ရက်မှာ ကြေညာပါတယ်။
အဆိုပါရန်ပုံငွေအစီအစဉ်ကနေ ငလျင်ဒဏ် အပြင်းထန်ဆုံးခံရတဲ့ ဒေသတွေကို အကူအညီတွေ တိုးမြှင့်ပေးသွားမှာဖြစ်ပြီး အစားအစာ၊ ရေ၊ ဆေးဝါးနဲ့ နေစရာအမိုးအကာတွေအတွက် အဓိက ကူညီဆောင်ရွက်ပေးသွားမယ်လို့ ဆိုပါတယ်။
ပြည်နယ်ဖွံ့ဖြိုးတိုးတက်ရေးဆိုင်ရာဝန်ကြီး ဘဲရိုနက်စ်ချပ်မန်က “ပြင်းထန်တဲ့ ငလျင်လှုပ်ခတ်ပြီးနောက် ယူကေက မြန်မာပြည်သူပြည်သားတွေထံ အသက်ကယ် အကူအညီတွေ ချက်ချင်းပေးပို့နေပါတယ်။ ဒီကြေကွဲဖွယ်ဖြစ်ရပ်အတွက် မြန်မာပြည်သူပြည်သားအားလုံးကို အလေးနက်ဆုံးသော ကိုယ်ချင်းစာမှုနဲ့ ကရုဏာသက်မိပါတယ်” လို့ ပြောပါတယ်။
ယူကေရဲ့ ထောက်ပံ့ထားတဲ့ စတာလင်ပေါင် ၁၀ သန်းက ပြည်တွင်း မိတ်ဖက်အဖွဲ့အစည်းတွေအနေနဲ့ မြေပြင်မှာ လူသားချင်းစာနာထောက်ထားမှုဆိုင်ရာ တုံ့ပြန်ဆောင်ရွက်မှုတွေကို အကောင်အထည်ဖော် ဆောင်ရွက်ရာမှာ အထောက်အပံ့ကောင်းဖြစ်ဖို့ ရည်ရွယ်တယ်လို့လည်း ထုတ်ပြန်ချက်မှာ ဖော်ပြထားပါတယ်
မတ်လ ၂၈ ရက်က မြန်မာနိုင်ငံအလယ်ပိုင်းကို ပြင်းအား ရစ်ချ်တာစကေး ၇ ဒသမ ၇ အဆင့်ရှိတဲ့ မြေငလျင်လှုပ်ခတ်ခဲ့ရာမှာ လူပေါင်း ၂၀၀၀ ကျော် သေဆုံးပြီး နေအိမ်တွေ၊ အဆောက်အဦတွေ အမြောက်အမြား ပျက်စီးသွားခဲ့တာ ဖြစ်ပါတယ်။
