မန္တလေးတိုင်း၊ ကျောက်ဆည်မြို့၊ အေးမြကြည်လင်ရပ်ကွက်မှာရှိတဲ့ ရွှေပြည်သာရွှေဆိုင်ကို မတ် ၂၅ ရက် မနက် ၁၀ နာရီက သေနတ်ကိုင်ဆောင်ထားတဲ့ စစ်ကောင်စီတပ် လက်အောက်ခံ ပြည်သူ့စစ်တယောက်က ဓားပြဝင်တိုက်လို့ ရွှေ ၂၀ ကျပ်သား ပါသွားတယ်လို့ မြို့ခံတွေဆီက သိရပါတယ်။
မနေ့မနက် ၁၀ နာရီက ရွှေပြည်သာရွှေဆိုင်ကို ပြည်သူ့စစ်အလံပါ ပြောက်ကျားအင်္ကျီ ဝတ်ဆင်ပြီး စကားပြောစက် ကိုင်ထားတဲ့ အမျိုးသားတယောက် ဝင်လာပြီး ရွှေဆိုင်ပိုင်ရှင်ရဲ့ သားနဲ့သမီးကို သေနတ်နဲ့ချိန်ကာ ရွှေထည်ပစ္စည်းတွေ လုယက်သွားတယ်လို့ မြို့ခံတယောက်က ပြောပါတယ်။
“ရဲလိုလို စစ်သားလိုလိုနဲ့ ဝင်လာပြီး ဆိုင်မှာရှိတဲ့ ဝယ်သူတွေကို နှင်ထုတ်ပြီး သေနတ်ပြ ခြိမ်းခြောက်ပြီး ရွှေတွေ ရသလောက်လုသွားတာ။ လုတဲ့သူကိုတော့ မမိဘူး။ စစ်သားရော၊ ရဲတွေရော၊ ပြည်သူ့စစ်တွေရော တယောက်နဲ့တယောက် လွှဲချနေတယ်။”
ရဲတပ်ဖွဲ့နဲ့နီးစပ်သူတဦးက “ရွှေဆိုင်ထဲကို ဝင်လာပြီး ဒီရွှေဆိုင်ကို ဓားပြတွေ လာတိုက်တော့မယ်။ ပစ္စည်းတွေ အကုန်သိမ်း၊ ဝယ်သူတွေကိုလည်း နှင်ထုတ်၊ စကားပြောကလည်း ဖွင့်ထားတော့ ဆိုင်က ယုံတာပေါ့။ ဝယ်သူတွေ ထွက်တဲ့အချိန် ဆိုင်ရှင် သားနဲ့သမီးကို သေနတ်ပြပြီး ဓားပြတိုက်သွားတာ။ ရွှေ ၂၀ သားလောက် ပါသွားတယ်” လို့ ပြောပါတယ်။
ပြစ်မှုကျူးလွန်သူကို CCTV မှတ်တမ်းအရ ရဲတွေက ရှာဖွေနေပြီး ပုံပန်းသဏ္ဌာန်က စစ်ကြောင်းကို လမ်းပြတဲ့ ပြည်သူ့စစ်တစ်ယောက်ရဲ့ပုံစံနဲ့ တူတယ်လို့ ပြောပါတယ်။
လတ်တလောမှာ ရွှေပြည်သာရွှေဆိုင် လုယက်ခဲ့သူကို မမိသေးပေမဲ့ စစ်တပ်၊ ရဲနဲ့ ပြည်သူ့စစ်တွေကြားမှာ အပြန်အလှန်ထိုးချမှုတွေ ရှိနေတယ်လို့ အုပ်ချုပ်ရေးနဲ့နီးစပ်သူက ပြောပါတယ်။
ဒါ့အပြင် ကျောက်ဆည်တပ်နယ်မှူး ဗိုလ်မှူးချုပ်တိုးကျော်မြင့် လက်နက်ထုတ်ပေးတဲ့ ပြည်သူ့စစ် ၃ ဖွဲ့ကလည်း အဆိုပါဖြစ်စဥ်နဲ့ပတ်သက်ပြီး သူတို့မလုပ်ကြောင်း လပခတိုင်းကို တင်ပြထားတယ်လို့ သိရပါတယ်။
