ပဲခူးတိုင်း၊ တောင်ငူမြို့နယ်၊ ကျွန်းကုန်းကျေးရွာမှာ အသက် ၁၆ နှစ်အရွယ် ၉ တန်းကျောင်းသူလေးတယောက်အား အုပ်စုဖွဲ့မုဒိမ်းကျင့်ပြီး သတ်ဖြတ်ခဲ့တဲ့ အမျိုးသား ၃ ယောက်ထဲက ၂ ယောက်ကို ရဲတွေဖမ်းမိထားတယ်လို့ မြို့ခံတွေဆီက သိရပါတယ်။
ကျွန်းကုန်းကျေးရွာ မြောက်ပိုင်းမှာ မတ် ၁၉ ရက် ညနေ ၄ နာရီက ၉ တန်းကျောင်းသူလေး တယောက်ကို တရွာတည်းနေ အမျိုးသား ၃ ယောက်က မုဒိမ်းကျင့်ပြီး လည်ပင်းလှီးသတ်ခဲ့တာလို့ ဒေသခံတယောက်က ပြောပါတယ်။
“သူ့အဖေရော အမေရော တောထဲသွားနေတဲ့အချိန် အိမ်နီးချင်းအမျိုးသား ၃ ယောက်က မုဒိမ်းကျင့်ပြီး လည်ပင်းကို ဓားနဲ့လှီးသတ်ခဲ့တာ အမေဖြစ်သူက ပြန်လာမှ တွေ့တာ၊ အမေဖြစ်သူကပဲ အုပ်ချုပ်ရေးကို အကြောင်းကြား၊ အုပ်ချုပ်ရေးက တဆင့်ရဲကို အကြောင်းကြားတာ။”
အခင်းဖြစ်ပွားတဲ့နေ့ ညနေပိုင်းနဲ့ မတ် ၂၀ ရက်မှာ ပြစ်မှုကျူးလွန်သူ အမျိုးသား ၂ ယောက်ကို ရဲတပ်ဖွဲ့က ဖမ်းမိခဲ့ပြီး သူတို့ရဲ့ထွက်ဆိုချက်အရ ပြစ်မှုကျူးလွန်ရာမှာ ပါဝင်တဲ့ နောက်ထပ် အမျိုးသားတယောက်ကို ဖမ်းဆီရမိရေးအတွက် လုပ်နေတယ်လို့ ရဲတပ်ဖွဲ့နဲ့နီးစပ်သူက ပြောပါတယ်။
“မှုခင်းဆေးစစ်ချက်အရ အုပ်စုဖွဲ့မုဒိမ်းကျင့်ခံရတာလို့ အဖြေထွက်တယ်။ မုဒိမ်းကျင့်ရုံတင် မဟုတ်ဘဲ လူတယောက်ကို စိတ်ရှည်လက်ရှည် ဓားနဲ့ ထိုးခုတ်သွားတယ်ဆိုတာ ကောင်မလေးရဲ့ ဒဏ်ရာတွေကလည်း သက်သေပြနေတယ်။ မိထားတဲ့ ၂ ယောက်ကလည်း ဝန်ခံထားတယ်။”
လတ်တလောမှာ ဖမ်းမိထားတဲ့ ပြစ်မှုကျူးလွန်သူ စည်သူနိုင်(ခ)မှဲ့ကြီး၊ သိန်းထိုက်အောင်(ခ)သားပု တို့ကို တောင်ငူမြို့မရဲစခန်းက ချုပ်ရက်ရမန်ယူကာ စစ်ဆေးနေပြီး ကျန်တယောက်ကို စုံစမ်းရှာဖွေနေဆဲ ဖြစ်ပါတယ်။
သေဆုံးသွားသူ အသက် ၁၆ နှစ်အရွယ် ကိုးတန်းကျောင်းသူလေးမှာ လိမ္မာယဥ်ကျေးပြီး ပညာရေးထူးချွန်ကာ မိဘအပေါ် သိတတ်သူတယောက် ဖြစ်တာကြောင့် မိဘနဲ့ ဆွေမျိုးသားချင်းတွေ ရူးမတတ်အောင် ခံစားနေရတယ်လို့ ဒေသခံတွေက ပြောပါတယ်။
