ရခိုင်ပြည်နယ် မြောက်ဦးမြို့မှာရှိတဲ့ အမှတ် ၃၁ ရဲတပ်ရင်းဟောင်းကို မတ် ၁၈ ရက် မနက် ၂ နာရီလောက်မှာ စစ်ကောင်စီ လေကြောင်းတိုက်ခိုက်ခဲ့တယ်လို့ မြောက်ဦးမြို့ခံတွေဆီက သိရပါတယ်။
စစ်ကောင်စီက လေကြောင်းကနေ ၂ ကြိမ်လာရောက်တိုက်ခိုက်ခဲ့တာဖြစ်ပြီး အထိအခိုက်မရှိဘူးလို့ မြောက်ဦးမြို့ခံအမျိုးသားတယောက်က ပြောပါတယ်။
“ဒီနေ့မနက်ပိုင်းမှာ စစ်ကောင်စီက သူတို့တပ်စခန်းချခဲ့တဲ့ ၃၁ ရဲတပ်ရင်းဟောင်းကို လေကြောင်းတိုက်ခိုက်မှု ပြုလုပ်ခဲ့တာရှိတယ်။ လူအထိအခိုက်တော့မရှိဘူး။ အဓိက AA တပ်ဖွဲ့ဝင်တွေ နေထိုင်မှုရှိတယ်ဆိုပြီး စစ်ကောင်စီက လာရောက်ဗုံးကြဲတိုက်ခိုက်တာဖြစ်တယ်။ ဗုံး ၅ လုံးမှာ ၃ လုံးပဲ ပေါက်ကွဲခဲ့ပြီးတော့ နောက်ထပ် ၂ လုံးမပေါက်လိုက်ဘူး” လို့ ပြောပါတယ်။
မတ် ၁ ရက်နေ့ကလည်း မောင်တောမြို့နယ်ရှိ စစ်ကောင်စီရဲ့ နယ်ခြားစောင့်တပ်ရင်းဌာနချုပ် ကျီးကန်ပြင်ကို လေကြောင်းတိုက်ခိုက်မှုပြုလုပ်ခဲ့တာကြောင့် အဆောက်အဦးတချို့ ထိခိုက်ပျက်စီးခဲ့ပါတယ်။
ဒါအပြင် ဖေဖော်ဝါရီ ၁၈ ရက်ကလည်း မြောက်ဦးမြို့နယ် ရမ်းချောင်းဒေသမှာရှိတဲ့ စစ်သုံ့ပန်းမိသားစုဝင်တွေ ထိန်းသိမ်းထားတဲ့နေရာကို စစ်ကောင်စီက လေကြောင်းတိုက်ခိုက်ခဲ့တဲ့အတွက် စစ်သုံ့ပန်း မိသားစုဝင် ၂၈ ယောက်သေဆုံးကာ ၂၈ ယောက် ဒဏ်ရာရရှိခဲ့ပါတယ်။
စစ်ကောင်စီဟာ ရခိုင်မှာရှိတဲ့ တပ်စခန်းတွေနဲ့ မြို့တွေ ဆက်တိုက်ဆိုသလို ဆုံးရှုံးနေရတာကြောင့် အရပ်ဘက်ပစ်မှတ်တွေနဲ့ သူတို့တပ်စခန်းဟောင်းတွေကို ပစ်မှတ်ထားပြီး လေကြောင်းတိုက်ခိုက်မှုတွေကို ဆက်တိုက်လုပ်ဆောင်လာနေတာလို့ သိရပါတယ်။
