စစ်အာဏာသိမ်းစကနေ ၂၀၂၅ ခုနှစ် ဖေဖော်ဝါရီ ၂၅ ရက်အထိ စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် ချင်းလူမျိုး ၂၈၀ ကျော် သေဆုံးခဲ့တယ်လို့ ချင်းရေးရာအဖွဲ့ချုပ် ICA က မတ် ၃ ရက်မှာ အစီရင်ခံစာ ထုတ်ပြန်ခဲ့ပါတယ်။
သေဆုံးသူ ၂၈၀ ကျော်ထဲမှာ အရပ်သားပြည်သူ အယောက် ၂၀၀ နဲ့ ချင်းတော်လှန်ရေးတပ်ဖွဲ့ဝင် အယောက် ၈၀ တို့ ပါဝင်ပါတယ်။
အာဏာသိမ်း ၄ နှစ်တာ ကာလအတွင်း စစ်ကောင်စီက ချင်းပြည်နယ်နဲ့ ပြည်နယ်ပြင်ပက ချင်းလူမျိုးတွေ နေထိုင်တဲ့ နေရာတွေကို လေကြောင်းတိုက်ခိုက်မှု အကြိမ်ရေပေါင်း ၂၅၀ ကျော် ပြုလုပ်ခဲ့တယ်လို့ အစီရင်ခံစာမှာ ဖော်ပြပါတယ်။
လေကြောင်းတိုက်ခိုက်မှုတွေကြောင့် ချင်းလူမျိုးတွေရဲ့ နေအိမ်ပေါင်း ၁,၈၀၀ နီးပါးနဲ့ ဘာသာရေး အဆောက်အအုံပေါင်း အခု ၇၀ နီးပါး ပျက်စီးခဲ့တယ်လို့ သိရပါတယ်။
ချင်းပြည်နယ်မှာဖြစ်ပွားတဲ့ တိုက်ပွဲတွေနဲ့ စစ်ကောင်စီတပ်ရဲ့ လေကြောင်းတိုက်ခိုက်မှုတွေကြောင့် ချင်းပြည်သူ ၆၅,၀၀၀ ကျော်ဟာ အိမ်နီးချင်း အိန္ဒိယနိုင်ငံဘက်ကို ထွက်ပြေး တိမ်းရှောင်ခဲ့ရတယ်လို့ ချင်းရေးရာအဖွဲ့ချုပ်ရဲ့ စာရင်းတွေအရ သိရပါတယ်။
