အိန္ဒိယနိုင်ငံအနောက်ပိုင်း၊ အာမက်ဒါဘက်မြို့ကနေ လန်ဒန်ကို ဇွန် ၁၂ ရက်က ဦးတည်ထွက်ခွာလာတဲ့ Air India လေကြောင်းလိုင်းက ခရီးသည်တင်လေယာဉ်တစင်းဟာ ပျံတက်ပြီး မကြာမီမှာ ပျက်ကျသွားတယ်လို့ သိရပါတယ်။

လူ ၂၄၂ ယောက် လိုက်ပါလာတဲ့ လေယာဉ်ဟာ လေဆိပ်အနီး လူနေအိမ်ခြေတွေရှိတဲ့နေရာကို ပျက်ကျသွားခဲ့ပါတယ်။

ပျံသန်းမှုအမှတ်စဉ် AI171 လေယာဉ်ဟာ ပျံတက်ပြီး စက္ကန့်ပိုင်းအကြာ ဒေသစံတော်ချိန်မနက် ၁၀ နာရီ ၈ မိနစ်၊ ၅၁ စက္ကန့်မှာ နောက်ဆုံးဆက်သွယ်မှုရရှိခဲ့တယ်လို့ Air India က ထုတ်ပြန်ပါတယ်။