ကမ္ဘာ့ရွှေဈေး မြင့်တက်မှုကြောင့် ပြည်တွင်းအခေါက်‌ရွှေဈေးကျပ် ၇၇ သိန်းကျော်ထိ  ဈေးတက်လာတယ်လို့ ရွှေဈေးကွက်အတွင်းက သိရပါတယ်။

မနေ့က ပြင်ပဈေးကွက်မှာ တကျပ်သားကို ကျပ် ၇၆ သိန်းကျော်ရှိခဲ့ရာက တရက်အတွင်း ကျပ် ၁ သိန်း ဝန်းကျင် ဈေးတက်လာပြီး ဒီကနေ့ ညနေပိုင်းမှာ ကျပ် ၇၇ သိန်းကျော်ကို ရောက်ရှိလာပါတယ်။

ကမ္ဘာ့ရွှေဈေးကလည်း မေ ၃၀ ရက်က တအောင်စကို  ၃၂၈၉ ဒေါ်လာ နဲ့ ဈေးပိတ်ခဲ့ပြီး ဒီကနေ့ ညနေပိုင်းမှာ တအောင်စကို ၃၃၄၉ ဒေါ်လာအထိ မြင့်တက် ရောက်ရှိလာတာပါ။

ကမ္ဘာရွှေဈေးက ရက်ပိုင်းအတွင်း တအောင်စကို ၅၉ ဒေါ်လာ၊ ရာခိုင်နှုန်းအနေနဲ့ ၂ ရာခိုင်နှုန်း နီးပါးထိ ဈေးခုန်တက်လာပါတယ်။

အခုလို ကမ္ဘာရွှေဈေး တအောင်စကို အမေရိကန် ဒေါ်လာ ၃၃၄၀ အထက် ဈေးတန်း ရောက်ရှိနေချိန် ရန်ကုန်တိုင်း ဒေသကြီး ရွှေလုပ်ငန်းရှင်များအသင်းက ဓာတ်သတ္တု (ရွှေ) ရည်ညွှန်းစျေးကို ၅,၇၇၀,၀၀၀ ကျပ် သတ်မှတ်ထားပါတယ်။

အမေရိကန် ဒေါ်လာနဲ့ မြန်မာကျပ်ငွေ လဲလှယ်နှုန်းကတော့ ဒီကနေ့ ဇွန် ၂ ရက်နေ့မှာ ၄၃၆၀ ကနေ ၄၄၆၀ ကြား အရောင်းအဝယ်ဖြစ်နေပြီး အနည်းငယ် ပြန်တက်ရိပ်ပြနေပါတယ်။