ကျနော်တို့ မြန်မာဆိုတာ သူတို့အတွက်တော့ တကယ့် ပျားရည်နိုင်ငံကြီး။ ဒါပေမဲ့ ကိုယ့် တိုင်းရင်းသားလူမျိုးပေါင်စုံအတွက်တော့ ဒီပျားရည်ဆိုတာ ဓားသွားထက်က အဆိပ်အတိပြီးတဲ့ ပျားရည်စက်တွေချည်းပဲ။ ဇော်ဝင်းထွဋ် နာမည်ကြီးစက တနိုင်ငံလုံးရခဲ့တဲ့ ပျားရည်သီချင်း သွားသတိရမိတယ်။ တေးရေးသုခမိန်လှိုင် (ဦးလှိုင်) ကပဲ ဒါတွေကြိုသိလို့ တဖက်လှည့်နဲ့ ရွေးဖွဲ့ပေးခဲ့လေသလားမသိ။

“အရှေ့နဲ့အနောက် တောင်နဲ့မြောက်မှာ အဆိုးများက နေရာတိုင်းဝိုင်း” တဲ့။

ကမ္ဘာ့မြေပုံမှာ မြန်မာနိုင်ငံမြေပုံကို ကွက်ကြည့်။ မြေပုံညာဘက် ရှမ်း၊ ကချင်နယ်စပ်တလျှောက် အိမ်နီးချင်းက ဒီနေ့အမေရိကန်ကို မဖြစ်ညစ်ကျယ်နည်းလမ်းပေါင်စုံနဲ့ ယှဉ်ပြိုင်အန်တုနေတဲ့ တရုတ်၊ ရှမ်းပြည်အထွတ်လေးမှာက ရွှေတြိဂံဆိုတဲ့ နာမည်ကြီး မူးယစ်ဒုစရိုက်ဇုန်နဲ့ကပ်လျက် လာအို၊ သူ့အောက်မှာ ကရင်၊ တနင်္သာရီတကျောလုံးနဲ့ ကပ်လျက်အိမ်နီးချင်းက ထိုင်း။ ထိုင်း-မြန်မာနယ်စပ်တလျှောက်မှာလည်း ဒီကနေ့ ကမ္ဘာကိုခြောက်လှန့်နေတဲ့ တရုတ်ကျားဖြန့် လုပ်ငန်းတွေ၊ လောင်းကစား၊ လူမှောင်ခို၊ မူးယစ်ဆေးဝါး ဗဟိုချက်တွေ ပြည့်နှက်လို့။ မကောင်းဆိုးဝါး အရှေ့တံခါးကြီးလို့ ခေါ်နိုင်မလားမသိ။ မြေပုံရဲ့ ဝဲဘက် အနောက်တံခါးကြီး ကြည့်ပြန်တော့ မြောက်ဖျားပိုင်းကနေ ရခိုင်ပြည်နယ်အထိ နယ်နိမိတ်ချင်း ဆက်ဆက်နေတာက ကမ္ဘာ့လူဦးရေအများဆုံးလည်းဖြစ်၊ အင်အားအကြီးမားဆုံး ဒီမိုကရေစီနိုင်ငံတော်လို့လည်း သတ်မှတ်ကြတဲ့ အိန္ဒိယ။ ကုန်းချင်းကို ဆက်နေတာ။ အိန္ဒိယနဲ့ ရခိုင် ထိစပ်နေတဲ့ နယ်စပ်စည်းမှာ ဘင်္ဂလားဒေ့ရှ်ကလည်း ပြဿနာသိပ်များတဲ့ ဘူးသီးတောင်၊ မောင်းတောနားကပ်လျက် အိမ်နီးချင်းအဖြစ် ကုန်းချင်းဆက်နေပြန်ရော။ ဒါပေမဲ့ ဒေါင်းတကောင်လို လှတဲ့ ကျနော်တို့ မြန်မာနိုင်ငံဆိုတာ ရခိုင်အောက်ပိုင်းကနေ တနင်္သာရီအဆုံး ဘင်္ဂလားပင်လယ်အော်၊ အက်ဒမန်ပင်လယ်ဆိုတဲ့ သမုဒ္ဒရာကြီးရဲ့ ရေလမ်းခရီးက အပွင့်ကြီး ပွင့်လို့။

ဒီကနေ့ ရှမ်းပြည်နယ်နဲ့ ထိစပ်နယ်စပ်ဇုန်တွေအားလုံး စစ်ကောင်စီ စစ်ရှုံးပြီးစွန့်လွှတ်လိုက်ရတော့ တရုတ်ဝင်လာပြီး ဖိအားပေးရင်း လားရှိုးကို ပြန်ပေးလိုက်ရတာ မငြင်းနိုင်တဲ့ အနေအထားကြောင့်လို့ သက်ဆိုင်ရာ လက်နက်ကိုင်အဖွဲ့က ဖွင့်ပြောခဲ့ပြီးသား။ ထိုင်းဆိုတာလည်း ကိုယ့်ဆီက သဘာ၀ဓာတ်ငွေ့တွေရတာမှ နိုင်ငံတွင်းလိုအပ်မှုထက် ၃၀ ရာခိုင်နှုန်းတောင် ပိုလျှံနေလို့ ပြည်ပကို ပြန်ရောင်းနေရတဲ့ ဟိုဘက် ကမ်းမ မနှင်းတို့အိမ်။ သူတို့ခိုင်းချင်သမျှ အိမ်ဖော်၊ မာလီ၊ မိလ္လာ၊ အမှိုက်ကောက်၊ လယ်သမား ခိုင်းဖတ် မှန်သမျှကို တို့တွေဆီက သနားစရာ ပြည်သူတွေကို ခေါင်းခေါက်ပြီး မဖြစ်ညစ်ကျယ် လစာလေး ပေး ခိုင်းစားနေနိုင်တဲ့နိုင်ငံ။ စျေးအပေါဆုံးနဲ့ ရတဲ့ မြန်မာအလုပ်သမားရင်းမြစ်ကြီးပေါ် ခွထိုင် ခိုင်းစားပြီး အသက်သခင် အိမ်ကြီးရှင် လုပ်နေတဲ့ နိုင်ငံ။  ကဲ . . . အဲ့ဘက်ဆိုတဲ့ အရှေ့တံခါးဘက် တခြမ်းကို ထားလိုက်တော့။

အနောက်ဘက်မှာ မြန်မာဟာ အိန္ဒိယနဲ့ ဘင်္ဂလားဒေ့ရှ်ဆိုတဲ့ ၂ နိုင်ငံနဲ့ နယ်ချင်းကပ်နေတယ်။ ဘင်္ဂလားဒေ့ရှ်ဆိုတာကလည်း အင်္ဂလိပ် ကိုလိုနီတွေ၊ အိန္ဒိယကနေ သီးခြားခွဲထွက်နိုင်ငံအဖြစ် သတ်မှတ်ပေးခဲ့တဲ့ ပါကစ္စတန် နှစ်ခြမ်းကွဲပြီး ထပ်ခွဲထွက်လာတဲ့ နိုင်ငံပါ။ မွတ်ဆလင် ဘာသာဝင် တွေများတဲ့ အရာမှာ ပါကစ္စတန်နဲ့ တူပေမဲ့ လူဦးရေများလွန်းပြီး ဆင်းရဲမွဲတေတဲ့နေရာမှာတော့ မတူဘူး။ ပါကစ္စတန်က အိန္ဒိယလိုပဲ နျူကလီးယားလက်နက်ပိုင်တယ်။ ဘင်္ဂလားဒေ့ရှ်က ဒုက္ခ ပင်လယ်ဝေသူတွေ ရခိုင်အနောက်တံခါးဆီ ပြေးထွက်ရာလမ်းကလည်း ပြဿနာတွေ အစဉ်အဆက်နဲ့။ ဒီနှစ်ပိုင်းထဲ အိန္ဒိယနဲ့ ပါကစ္စတန်ကြား၊ အိန္ဒိယနဲ့ မြန်မာကြား၊ မြန်မာနဲ့ ဘင်္ဂလားဒေ့ရှ်ကြား အဖြစ်အပျက်တွေက ရှုပ်ထွေးနက်နဲ များပြားလွန်းလာတယ်။ ဘင်္ဂလားဒေ့ရှ်မှာ  ပြည်သူရွေးကောက်တင်မြှောက်ခံ ဝန်ကြီးချုပ် ရှိတ်ဟာဆီနာ ကိုယ်တိုင် အမြင်မတူ ငါ့ရန်သူထုံး နှလုံးမူပြီး သူ့ပြည်သူတွေ သူကိုယ်တိုင် ပြန်နှိပ်ကွပ်ရာက နောက်ဆုံး နိုင်ငံ ရာဇဝတ်သားအဖြစ် အိန္ဒိယကို ထွက်ပြေးပြီး အစ္စလာမ္မစ် စစ်သွေးကြွဘက်ပါတာများတဲ့ ခေါင်းဆောင်သူအသစ်တွေ နိုင်ငံကို သိမ်းပိုက်သွားတယ်။ 

ပါကစ္စတန် အစ္စလာမ္မစ် စစ်သွေးကြွတွေရဲ့ ဟိုအရင်ကတည်းက ရည်မှန်းချက်က နိုင်ငံနဲ့ နယ်နိမိတ်ချင်းထိစပ်နေတဲ့ အိန္ဒိယ ကက်ရှ်မီးယား၊ ပန်ဂျပ် အစရှိတဲ့ နယ်မြေတွေကို စိမ့်ဝင် သိမ်းပိုက်ဖို့။ ဒီ ၃ နိုင်ငံ တြိဂံဇုန် ဟိမ၀န္တာတောင်ကြော ရေခဲတောင်ထိပ်တဖက်ခြမ်းမှာ တရုတ်က စစ်အင်အား အပြည့်ထားပြီး အိန္ဒိယရဲ့ အရူနာချယ် ပရာဒက်ရှ်ပြည်နယ်ဆိုတာ သူတို့ ပိုင်တယ်ဆိုပြီး ချောင်းနေတယ်။ သူတို့လက်အောက်ခံ တိဗက်တောင်ပိုင်းက ပိုင်တဲ့  Zangnan အမည်ရ နယ်မြေလို့ အပိုင်တွက် ခြိမ်းခြောက်နေပြန်ရော။

မကြာသေးမီကပဲ ပါကစ္စတန်စစ်သွေးကြွတွေ ကက်ရှ်မီးယားဒေသထဲဝင်လာပြီး အိန္ဒိယသား ခရီးသွား ဟိန္ဒူအမျိုးသား ၂၆ ယောက်ကို ဘာသာမေးပြီး သေနတ်နဲ့ တေ့ ပစ်သတ်မှု ဖြစ်ပွားတော့ နှစ်နိုင်ငံကြား နယ်စပ်မှာ ၃၊ ၄ ရက်ကြာ တိုက်ပွဲဖြစ်ကြတယ်။ ဝါဒဖြန့်သတင်းလား၊ တကယ့်သတင်းအစစ်လား မခွဲခြားနိုင်တဲ့ ရင်းမြစ်တွေအရ ပါကစ္စတန်ရဲ့ တရုတ်ဆီက ဝယ်ထားတဲ့ ဖိုက်တာဂျက်လေယာဉ်တစီးတည်းက အိန္ဒိယ ဖိုက်တာဂျက်လေယာဉ် ၅ စီးကို ပစ်ချနိုင်ခဲ့တယ်ဆိုပဲ။ ဒီတိုက်ပွဲ ရက်တိုနဲ့ အပစ်အခတ်ရပ်စဲသွားချိန် တရုတ်က အိန္ဒိယရဲ့ အရူနာချယ်ပရာဒက်ရှ်ပြည်နယ်ထဲက လူများနေထိုင်ရာ နေရာ ၅ ခု‌၊ တောင် ၁၅ လုံး၊ ဖြတ်သန်းသွားလာရာ လမ်း ၄ နေရာ၊ မြစ် ၂ ခု၊ ရေကန်ကြီး ၁ ကန်အပါ စုစုပေါင်း နေရာ ၂၇ နေရာ ကို တရုတ်နာမည်တွေ ပြောင်းပေးကြောင်း နိုင်ငံတကာသိ ထုတ်ပြန်သွားပါရော။ 

၂၀၂၀ ပြည့်နှစ်က အငြင်းပွား ဟိမ၀န္တာတောင်တန်း နှစ်နိုင်ငံနယ်စပ်စည်းကြား အုပ်စုလိုက် သေနတ်မပါ တိုက်ခိုက်ကြတော့ အိန္ဒိယ စစ်သား ၂၀၊ တရုတ်စစ်သား ၄ ယောက်သေရတဲ့ ပြဿနာလည်း ရှိခဲ့တယ်။ ဒါကြောင့် မနှစ်က တရုတ်ဟာ အရူနာချယ်ပရာဒက်ရှ်ပြည်နယ်ထဲက နေရာ ၃၀ ကို သူတို့ပိုင်နက်ဖြစ်လို့ တရုတ်နာမည်တွေ ပေးခဲ့သေးတော့ ပတ်ခြုံဟီး ရှုပ်ထွေးနေပြီ မဟုတ်ပေဘူးလား။

ဒီအခြေအနေတွေကို ကြည့်ရင် ရှင်းနေပါပြီ။ အိုဟောင်းနေပေမဲ့ အသုံးဝင်လွန်းဆဲ သံတမန်သုံး စကားပုံ တခုလိုပါပဲ။ My enemy’s enemy is my friend တဲ့။ ငါ့ရန်သူရဲ့ ရန်သူဟာ ငါ့မိတ်ဆွေပဲ တဲ့။ ဒါဆို ဘယ်သူတွေက ရန်သူချင်းဖြစ်ပြီး ဘယ်သူတွေနဲ့ ဘယ်သူတွေက သွယ်ဝိုက်ပြီး မိတ်ဆွေ တွေ ဖြစ်ကုန်ကြမလဲ။

ယူနန်မှသည် မြန်မာကိုဖြတ်ပြီး အာဆီယံကနေ ကမ္ဘာပတ်မယ့် ခါးပတ်လမ်းစီမံကိန်းနဲ့ တောင်တရုတ်ပင်လယ်အပြင် အိန္ဒိယ သမုဒ္ဒရာကိုပါ ထွက်နိုင်မယ့် ကျောက်ဖြူရေနက်ဆိပ်ကမ်း စီမံကိန်း (သမုဒ္ဒရာ နှစ်စင်းပေါ်လစီ) အတွက် တရုတ်ဟာ နိုင်ငံ စီးပွားကျနေတဲ့ကြားက အန္တရာယ် ကြီးလွန်းတဲ့ စွန်စားရင်းနှီးမှုတွေ လုပ်ထားတယ်။ အိန္ဒိယကလည်း အရှေ့တောင်အာရှကို တနေရာတည်းသော ကုန်းလမ်းက ဖြတ်ထွက်ပြီး စီးပွားကူးသန်းလုပ်နိုင်ရေး ကုလားတန် ဘက်စုံစီမံကိန်းကြီးမှာ အစွမ်းကုန် ရင်းနှီးမြှုပ်နှံထားတော့ သူတို့ နှစ်နိုင်ငံအတွက် မြန်မာနိုင်ငံဟာ သေရေးရှင်ရေးတမျှ အရေးပါတဲ့ ဗဟိုချက်ဖြစ်လို့။  ဒီအချိန်မှာ မြန်မာနဲ့ နယ်စပ်ချင်း ဆက်နွှယ်နေတဲ့ ဘင်္ဂလားဒေ့ရှ်ဘက်က အရွေ့ကရော ဘယ်အခြေအနေတွေ ဖြစ်ကုန်ပြီလဲ။

ဘင်္ဂလားဒေ့ရှ်ဟာ ရခိုင်မှာ စစ်တွေ၊ ကျောက်ဖြူနဲ့ မြန်အောင်သာ ဆက်သိမ်းဖို့ ကျန်တော့တဲ့ အာရက္ခတပ်တော် (AA) ကို အဓိက ထောက်ပံ့ပို့ဆောင်ရေးလုပ်သူအဖြစ် နောက်ကွယ်က အခိုင်အမာရပ်တည်နေကြောင်း သတင်းတပုဒ် ပြီးခဲ့တဲ့လက ထွက်လာတယ်။ မြန်မာနယ်စပ်အနီး AA စစ်အောင်ဖို့ လိုအပ်သမျှ မသေစေနိုင်သော စစ်ရေးထောက်ပို့ပစ္စည်း ဂိုထောင်ကြီး တည်ဆောက်၊ တပ်ရင်းကြီး ၃ ခုက အမေရိကန်ရဲ့ လမ်းညွှန်ခိုင်းစေမှုနဲ့ AA ကို အကူအညီပေးနေကြောင်း အိန္ဒိယ သတင်းမီဒီယာတခုက တက်လာတာပါ။ အလုံးစုံ ဟုတ်မဟုတ်တော့ မသေချာပေမဲ့ အမေရိကန် စစ်ဘက်ဆိုင်ရာ ထိပ်တန်းပုဂ္ဂိုလ်တွေနဲ့ ဘင်္ဂလားဒေ့ရှ်နိုင်ငံ စစ်ရေးအကြီးအကဲတွေ တွေ့ဆုံပြီး မြန်မာ့အရေး ဆွေးနွေးခဲ့ကြတာအမှန်ပဲ ဆိုတာတော့ ဘင်္ဂလားဒေ့ရှ်ဘက်က ထုတ်ပြန်ခဲ့တယ်။ ကဲ . . . ဒါဆိုရင် မြန်မာကို ပတ်ချာလည်ဝိုင်းနေတဲ့ အိမ်နီးချင်းတွေထဲ ဘယ်နိုင်ငံတွေက ရန်သူရဲ့ ရန်သူဆိုတဲ့ မိတ်ဆွေဖြစ်နိုင်မလဲ . . .။

ဘင်းစတက်အစည်းအဝေးတုန်းက အိန္ဒိယဝန်ကြီးချုပ် မိုဒီဟာ မင်းအောင်လှိုင်နဲ့ သီးသန့်တွေ့ဆုံပြီး ငလျင်ဒဏ်သင့်သူတွေအတွက် ကူညီပေးဖို့ စီမံကိန်းတွေ အတည်ပြုပေးခဲ့တယ်။ ဒါပေမဲ့ ထုတ်ပြန်ချက်မှာ မြန်မာ့ငြိမ်းချမ်းရေး၊ စည်ပင်သာယာ၀ပြောရေး၊ တည်ငြိမ်းအေးချမ်းရေးရဖို့ သက်ဆိုင်ရာ ပတ်သက်တဲ့ အသိုက်အဝန်းတွေအားလုံးနဲ့ ဆက်ဆံပြောဆိုသွားရပါလိမ့်မယ်လို့လည်း ထုတ်ပြန်ခဲ့တယ်။ မင်းအောင်လှိုင်ကို မင်းရန်ဘက်လို့ သဘောထားတဲ့ အဖွဲ့တွေနဲ့ ဆွေးနွေးမယ်ဆိုတဲ့ အကြောင်း သတိပေး၊ အသိပေး ပြောဆိုသွားတာမျိုးလို့ မြင်မိလိုက်သေးတယ်။

အိန္ဒိယ - ပါကစ္စတန်နယ်စပ်မှာ နှစ်နိုင်ငံ တိုက်ပွဲတွေ ဖြစ်တယ်။ ပြီးခဲ့တဲ့ ရက်ပိုင်းက အိန္ဒိယနဲ့ မြန်မာ နယ်စပ်မှာ ဘယ်အဖွဲ့မှန်း မထုတ်ပြန်တဲ့ လက်နက်ကိုင် အင်အားစုတစုကို အိန္ဒိယ နယ်ခြားစောင့်အရန်တပ် အာသံရိုင်ဖယ်က စစ်ဆင်ရေးအဖြစ် တိုက်ခိုက်တော့ ၁၀ ယောက် အသေရမိပြီး လက်နက်ခဲယမ်းများစွာ သိမ်းဆည်းရမိတယ်လို့ အိန္ဒိယသတင်းတွေကဆိုတယ်။ ဒီ ပစ်ခတ်မှုဖြစ်တဲ့ မဏိပူရပြည်နယ်ဆိုတာ ရန်သူတော် လူမျိုးစု ဖြစ်နေတဲ့ ကူကီးနဲ့ မိုင်တိုင်းတို့ နယ်စပ်စည်းကို လွတ်မြောက်နယ်မြေလို အသုံးချပြီး တိုက်ပွဲဖြစ်လိုက်၊ မြန်မာဘက်ကူးပြေးသွားလိုက်၊ အိန္ဒိယဘက်ပြန်ကူးလာလိုက် လုပ်နေကြရာက တခြားသော ပြင်ပ ပယောဂနှောင့်တဲ့ လက်နက်ကိုင်တွေ၊ မူးယစ်မှောင်ခိုမှုတွေနဲ့ ရှုပ်ထွေးနေတဲ့ နေရာပါ။ အိန္ဒိယရော မြန်မာတော်လှန်ရေး ဘက်တော်သားတွေအတွက်ပါ အနှောင့်အယှက်တွေ ဖြစ်စေမယ့် မတည်ငြိမ်မှုတွေကို ဒီဒေသမှာ ဖန်တီးနေတဲ့ နောက်ကွယ်က လက်မည်းကြီးကလည်း ရှိနေပြန်ပါတယ်။ နောက်ဆုံးတော့ အာသံရိုင်ဖယ်တပ်က မြန်မာ့မြေထဲအထိ ဝင်လာပြီး NUG  လက်အောက်ခံ တမူးခရိုင်၊ ပြည်သူ့ကာကွယ်ရေးအဖွဲ့ (ပကဖ) ရဲဘော် ၁၀ ယောက်ကို အယုံသွင်းဖမ်းဆီးသွားပြီး ဒဏ်ရာဗရပွဖြစ်တဲ့အထိ နှိပ်စက်၊ သတ်ဖြတ်ပြီး မှ ပြန်ပို့ပေးခဲ့တဲ့အကြောင်း ဖုံးမရလို့ ပေါ်လာခဲ့ပါပြီ။ သူတို့ဆီက နာမည်မဖော်ပြ၊ တိကျတဲ့ စစ်ဘက်ဌာနမဖော်ပြတဲ့ စစ်ဘက်အရာရှိတယောက်က နယ်စပ်ခြံစည်းရိုးခတ်တာကို လက်မခံဘဲ လာနှောင့်ယှက်လို့ ပစ်ခတ်ရာက သေဆုံးခဲ့ရတာဖြစ်ကြောင်း သတင်းပြန်လွှင့်လာတယ်။ အရင်ကလည်း အိန္ဒိယဟာ KNU နဲ့ တော်လှန်အင်အားစုတွေကို သတ်ခဲ့တဲ့ သမိုင်းဆိုး ရှိခဲ့တော့ အိန္ဒိယ ရပ်တည်ချက်ကလည်း ရန်သူရဲ့ ရန်သူဖြစ်တာတောင် မိတ်ဆွေခေါ်ဖို့ မတန်တဲ့ အဆင့်ဖြစ်နေတာ မြင်သာပြန်ပါပြီ။

မြန်မာ့ဒီမိုကရေစီအင်အားစုအတွက် အခက်ကတော့ ဒေါ်နယ်ထရမ့်ပ် အမေရိကန်သမ္မတ ဖြစ်လာပြီးနောက် ရောက်လာတယ်။ ၂၀၂၂ မှာ မြန်မာအတွက် လူသားချင်းဆိုင်ရာ စာနာနားလည်မှု အကူအညီတွေ၊ ဒီမိုကရေစီလှုပ်ရှားမှု အောင်မြင်နိုင်ရေး အထောက်အပံ့တွေ၊ တရားမဝင်တဲ့ အာဏာသိမ်းစစ်ကောင်စီဘက်က ခေါင်းဆောင်တွေကို ပိတ်ဆို့အရေးယူမှုတွေ လုပ်တဲ့ Burma Act မူဝါဒချမှတ်ထားမှုကို ထရမ့်ပ်က လွှတ်ချလိုက်တယ်။ ပြည်ပထောက်ပံ့မှုမှန်သမျှ ရပ်ဆိုင်းလိုက်မှတော့ တရုတ်ရဲ့ ကုပ်သွေးစုပ် စိုးမိုးအနိုင်ကျင့်မှုမှန်သမျှ ခံနေရတဲ့ မြန်မာအတွက် တအား လျော့သွားရတယ်လို့ ပြောနိုင်မလားပါပဲ။ မြန်မာပြည်ထဲ အိန္ဒိယ အလိုရှိတဲ့ စီမံကိန်းကြီးတွေ အထမြောက်လာနိုင်ရေးမှာလည်း အမေရိကန်လက်ရှောင်သွားတော့ တရုတ်ကြီးက စိန်ခေါ်သူ ပြိုင်ဘက်မဲ့ မင်းမူနေပြီလို့ အိန္ဒိယ ထိပ်တန်းဂျာနယ်လစ် Monideepa Banerjie က စိတ်ပျက်လက်ပျက်သဘော သုံးသပ်ရေးသားသွားတာ ဖတ်လိုက်ရတယ်။

ကျနော်တို့ နိုင်ငံဟာ ဇော်ဝင်းထွဋ်ရဲ့ ပျားရည်သီချင်းထဲကလို အဆိုးများက နေရာတိုင်း ဝိုင်းနေခဲ့တာ ခုမှတော့ မဟုတ်ပါဘူး။ ဒါပေမဲ့ ဒီကနေ ပြည်သူတရပ်လုံးပါဝင်တဲ့ နွေဦးတော်လှန်ရေးအသီးအပွင့်တွေအဖြစ် ကရင်- ထိုင်း နယ်စပ်တလျှောက်က စစ်ကောင်စီ တပ်စခန်းတွေ တခုပြီးတခု သိမ်းပိုက်ခံနေရတာ လက်ကျန်ဆိုလို့ လက်ချိုးရေလို့ရတဲ့ အဆင့် ရောက်လာပါပြီ။ တရုတ်ကြီး ဘယ်လောက် မင်းအောင်လှိုင်ကို ကြိုးဆွဲရုပ်အဖြစ် ဆက်ထားချင် ထားချင် တဖက် မြန်မာအနောက်တံခါးဘက်ခြမ်းတခုလုံးကိုလည်း AA က ထိန်းချုပ်ထားနိုင်လို့ ဘင်္ဂလားဒေ့ရှ်ရော အိန္ဒိယပါ AA နဲ့ မဖြစ်မနေ ဆက်ဆံနေရတဲ့ အနေအထားရောက်နေခဲ့ပါပြီ။ တရုတ်နဲ့ ကပ်လျက် ကချင်မှာလည်း စစ်ကောင်စီတပ်တွေ ခွက်ခွက်လန် တပ်ပျက်၊ စိုးမိုးနယ်မြေတွေ မရှိသလောက်ရှားလာပြီဖြစ်လို့ ကျနော်တို့အပေါ် အဆိပ်အတိပြီးစေခဲ့တဲ့ အရှေ့နဲ့ အနောက်တောင်နဲ့ မြောက်က ပျားရည်တွေဟာ မကြာခင် တကယ့်ချိုမြိန်ပျားရည် အစစ်တွေ ဖြစ်လာနိုင်ပါတော့မယ်။ ဒေါ်နယ်ထရမ့်ပ်ရဲ့ အကူအညီအထောက်အပံ့တွေ မရှိလည်း ငါတို့မှာ ငါတို့ပဲ ရှိတယ်ဆိုတဲ့ မြန်မာလူထုရဲ့ ကြွေးကြော်သံအတိုင်း တိုင်းရင်းသားလက်နက်ကိုင်တွေနဲ့အတူ ကိုယ်ထူကိုယ်ထ ဖက်ဒရယ် နိုင်ငံတော်ကြီး ဖြစ်တည်ရေး အားမလျှော့စတမ်း ဆက်လက်ယုံကြည် လျှောက်လှမ်းကြဦးစို့ဗျာ။

နွေလူ