ငလျင်‌ဒဏ်‌ကြောင့် စစ်ခေါင်းဆောင်က ယာယီအပစ်ရပ်မယ်လို့ ပြောထားပေမဲ့ ကလေးမြို့နယ်မှာတော့ စစ်တပ်က နေအိမ်တွေမီးရှို့တာ၊ အရပ်သားတွေနေထိုင်တဲ့ ကျေးရွာတွေဆီ လက်နက်ကြီးတွေနဲ့ ပစ်ခတ်တာတွေ လုပ်တယ်လို့ ဒေသခံတွေက ပြောပါတယ်။

ဧပြီ ၂ ရက် ညနဲ့ ၃ ရက် မနက်အစောပိုင်းက စစ်ကောင်စီတပ်က ဟံသာဝတီရွာဘက်ကနေ တင်သားရွာ၊ ကုက္ကိုလ်ရွာနဲ့ လယ်ခြားကျေးရွာတွေဘက်ကို လက်နက်ကြီးနဲ့ပစ်ခတ်ခဲ့သလို ဧပြီ ၁ ရက် နေ့ခင်းပိုင်းကလည်း ကလေးနည်းပညာတက္ကသိုလ်က စစ်ကောင်စီတပ်သားတွေဟာ သာယာဝတီကျေးရွာကို မီးရှို့ဖျက်ဆီးခဲ့တယ်လို့ ဆိုပါတယ်။

စစ်ကောင်စီရဲ့ လက်နက်ကြီးနဲ့ ပစ်ခတ်မှုကြောင့် ဒေသခံတွေ ထွက်ပြေးတိမ်းရှောင်နေကြရတဲ့အတွက် မီးရှို့ခံရတဲ့ နေအိမ်အ‌ရေအတွက် ဘယ်လောက်ရှိတယ်ဆိုတာ မသိကြရသေးဘူးလို့ ကလေးမြို့နယ်တောင်ပိုင်းက ဒေသခံတွေက ပြောပါတယ်။

မတ် ၂၈ ရက် လှုပ်ခတ်ခဲ့တဲ့ အင်အားပြင်းငလျင်ကြောင့် လူပေါင်းထောင်ချီသေဆုံးခဲ့ရပြီး ထောင်နဲ့ချီဒေသခံတွေ အိုးမဲ့အိမ်မဲ့ဖြစ်နေချိန် NUG ဘက်ကရော တိုင်းရင်းသားလက်နက်ကိုင်တွေဘက်ကပါ မြေပြင်ထိုးစစ်တွေ ရပ်မယ်လို့ ကြေညာထားပြီးနောက် စစ်ကောင်စီက ဧပြီ ၂ ရက်ညမှာ ၂၁ ရက်ကြာ ယာယီအပစ်ရပ်မယ်လို့ ပြောဆိုခဲ့ပါတယ်။

စစ်ကောင်စီက ယာယီအပစ်ရပ်မယ်လို့ ပြောဆိုနေပေမဲ့ ကျေးရွာတွေကို လက်နက်ကြီးနဲ့ထုတာ၊ နေအိမ်တွေကို မီးရှို့ဖျက်ဆီးတာတွေ လက်လုပ်နေတာကြောင့် အပြောနဲ့အလုပ်မညီကြောင်း ဒေသခံတွေကြား ဝေဖန်နေကြပါတယ်။