စစ်ကိုင်းတိုင်း၊ ဆားလင်းကြီးမြို့နယ်၊ မုံရွာ-ပုသိမ်လမ်းမှာ ဝမ်ပေါင်ကုမ္ပဏီက ကြေးသယ်ဖို့ လာရောက်တဲ့ ယာဉ်တန်းကို လုံခြုံရေးယူပေးတဲ့ စစ်ကောင်စီတပ်သားတွေရဲ့ ပစ်ခတ်မှုကြောင့် ဆားလင်းကြီးမြို့နယ်ထဲက ကျေးရွာတွေတချို့ ထွက်ပြေးတိမ်းရှောင်နေကြရတယ်လို့ ဒေသခံတွေက ပြောပါတယ်။
ဧပြီ ၂ ရက် ည ၁၀ နာရီလောက်ကတည်းက ဝမ်ပေါင်ကုမ္ပဏီ ကြေးသယ်ယာဉ်တန်းက မုံရွာ-ပုသိမ်လမ်းကနေ ယင်းမာပင်မြို့နယ်နဲ့ ဆားလင်းကြီးမြို့နယ်ဘက်ကို ထွက်လာခဲ့တာ ဖြစ်ပါတယ်။
ယာဉ်တန်းကို လုံခြုံရေးယူပေးတဲ့ စစ်ကြောင်းက လက်နက်ကြီး လက်နက်ငယ်နဲ့ ရမ်းသန်းပစ်ခတ်တဲ့အတွက် ယင်းမာပင်မြို့နယ် အရှေ့ဘက်ခြမ်းနဲ့ ဆားလင်းကြီးမြို့နယ် အနောက်ဘက်ခြမ်းက ကျေးရွာတချို့ ထွက်ပြေးတိမ်းရှောင်နေကြရတယ်လို့ သိရပါတယ်။
ဆားလင်းကြီးဒေသခံတယောက်က “ကြေးကားတွေ ထုတ်ဖို့အတွက် လုံခြုံရေးယူတဲ့ ကားတွေ စထွက်တယ်ပေါ့နော်။ အခုထိလည်း မုံရွာ-ပုသိမ် လမ်းပေါ်မှာ သူတို့နေရာယူထားတာ ရှိနေဆဲပဲ။ ယင်းမာပင်ဘက်ရော ဆားလင်းကြီးဘက်ခြမ်းရောဆို အင်အားကတော့ ၁၀၀ ဝန်းကျင်လောက်တော့ ရှိတယ်။ ရွာခံတွေကတော့ နီးစပ်ရာ လွတ်ရာတွေ ရှောင်နေကြရတယ်” လို့ ပြောပါတယ်။
ဧပြီ ၂ ရက် ညနေပိုင်းကစပြီး စစ်ကောင်စီတပ်သားတွေ အထိုင်ချထားတဲ့ ဆားလင်းကြီးမြို့နယ် အောင်ဇေယျကုန်း ဘက်လည်း လက်နက်ကြီးနဲ့ ပစ်ခတ်နေတယ်လို့ သိရပါတယ်။
