အင်အားပြင်း ငလျင်ဒဏ် အဓိကခံလိုက်ရတဲ့ စစ်ကိုင်းတမြို့လုံး ရေပြတ်နေတာကြောင့် မြို့ခံတွေဟာ ဧရာဝတီမြစ်ရေကို တိုက်ရိုက်သုံးနေကြရပြီး သောက်သုံးရေတွေလည်း ရှားပါး လိုအပ်နေကြပါတယ်။
ငလျင်ကြီး လှုပ်ခတ်ပြီးတဲ့နောက် စစ်ကိုင်းမြို့ပေါ်မှာ လျှပ်စစ်မီးနဲ့ သောက်သုံးရေတွေ ပြတ်လပ်သွားပြီး ကမ်းနားလမ်းရှိ မြစ်ရေတင်နေရာကနေ ဧရာဝတီမြစ်ရေကို တိုက်ရိုက်အသုံးပြုနေကြရပါတယ်။
ကမ်းနားလမ်းတလျှောက် ရေသယ်ယူတဲ့ ရေကားတွေနဲ့ ပြည့်နှက်နေပြီး ရေလာသယ်သူ တယောက်က သောက်ရေ ပိုခက်ခဲလာတယ်လို့ မြို့ခံတယောက်က ပြောပါတယ်။
“သောက်ရေနဲ့ အစားအစာပြတ်နေတာ။ အဓိကကတော့ သောက်ရေပေါ့။ သောက်ရေ ပြတ်နေတာ။ အဓိကကတော့ အကုန်လုံး စားဝတ်နေရေးပေါ့။ စားဝတ်နေရေးနဲ့ ရေပြတ်လပ်မှာပဲ စိုးတာပါ။ ရေကလည်း အခုက တချို့ဆိုရင်လည်း ဘုံဘိုင်ရေ၊ အဝီစိရေ သောက်နေရတာ။ အဓိက ရေပြတ်နေတာပါပဲ။”
လျှပ်စစ်မီးပြတ်တောက်တာ သောက်ရေ၊ သုံးရေ မရရှိတာ စတဲ့အခက်အခဲတွေက လက်လုပ်လက်စား မိသားစုဝင်တွေအတွက် ပိုပြီးကျပ်တည်းလာစေတာ ဖြစ်ပါတယ်။
မန္တလေးမြို့မှာတော့ ငလျင်ဘေးကြောင့် လုပ်ငန်းတွေ ရပ်ဆိုင်းသွားပြီး စားဝတ်နေရေး ပိုကျပ်တည်းလာတယ်လို့ ရွှေကြက်ယက်ဆိပ်ကမ်းမှာ ကျပန်းလုပ်ကိုင်နေသူတယောက်က ပြောပါတယ်။
“ကိုယ်က လက်လုပ်လက်စားသမား ဆိုတော့ သွားရေးလာရေး ဒုက္ခရောက်သွားရင် လုပ်ကိုင်စားသောက်ရတာ မကောင်းတော့တာပဲ။ ဒီဟာဖြစ်တာပဲ။ ပူပန်ရတာပေါ့။ အခု လမ်းတွေလည်း ပျက်ကုန်တော့ သွားရေးလာရေး ဒုက္ခရောက်ကုန်တယ်လေ။ မရှိ ရှိတဲ့အလုပ် လိုက်လုပ်နေရတာပဲ။ အခုလည်း မန္တလေး အလုပ်သွားလုပ်ရတာ ဆိုတော့။ အခုက မန္တလေးဘက်တွေ လမ်းတွေ အကုန်ပိတ်ကုန်တာဆိုတော့ တော်တော်ကို ဒုက္ခရောက်ပါတယ်။”
ငလျင်ဘေးကြောင့် ဓာတ်တိုင်တွေ ကျိုးကျကုန်တဲ့အပြင် မြေအောက်သွယ်တန်းထားတဲ့ ရေပိုက်တွေလည်း ပျက်စီးသွားတဲ့အတွက် စစ်ကိုင်းမြို့မှာ လျှပ်စစ်မီးနဲ့ ရေပြန်လည်ရရှိဖို့က လနဲ့ချီ ကြာမြင့်နိုင်တယ်လို့ မြို့ခံတွေက ခန့်မှန်းထားကြပါတယ်။
ဒါကြောင့် မြစ်ရေကို တိုက်ရိုက်အသုံးပြုနေရတဲ့ စစ်ကိုင်းမြို့ခံတွေအတွက် မသန့်ရှင်းတဲ့ရေ၊ မသန့်ရှင်းတဲ့ ပတ်ဝန်းကျင်ကြောင့် ကူးစက်ရောဂါတွေ ဖြစ်ပွားလာမှာကိုလည်း စိုးရိမ်နေကြရပါတယ်။
ဟန်န
