ငလျင်ဒဏ်သင့်တဲ့ နေပြည်တော်ကောင်စီနယ်မြေ၊ ဇမ္ဗူသီရိမြို့နယ်၊ ဘောဂသိဒ္ဓိရပ်ကွက်ထဲက ဝန်ထမ်းအများစု နေထိုင်တဲ့ သဇင်အဆောင် ၆ မှာ လုယက်မှုနဲ့ ဓားပြတိုက်မှုတွေ ဆက်တိုက် ဖြစ်လာတယ်လို့ ဝန်ထမ်းတွေက ပြောပါတယ်။
ဘောဂသိဒ္ဓိရပ်ကွက်ထဲမှာရှိတဲ့ ဝန်ထမ်းတွေနေထိုင်တဲ့ သဇင် ၆ အဆောင် ၃ မှာ မတ် ၃၁ ရက် မနက်က အမျိုးသမီးဝန်ထမ်းတယောက် ဓားပြတိုက်ခံရပြီး ရွှေနဲ့ ငွေကြေးတွေ ပါသွားတယ်လို့ အမည်မဖော်လိုတဲ့ ဝန်ထမ်းတယောက်က ပြောပါတယ်။
“အဆောင်ထဲထိဝင်ပြီး ဓားပြတိုက်တာ၊ အပျိုဝန်ထမ်းလိုင်းခန်းဆိုတော့ အများကြီး ပါမသွားပေမဲ့ အခုထိ ကြောက်နေကြတယ်။ ငလျင်က တမျိုး၊ လုတဲ့သူက တမျိုးနဲ့ ညဘက်ကျရင်လည်း မထင်ရင် မထင်သလို ဝင်လုတာ၊ မနေ့ညက အဆောင် ၁၅ ဘက်မှာ ဝင်လုသွားတယ်။”
မတ် ၂၉ ရက် ညပိုင်းကလည်း ဝန်ထမ်းအများစု နေထိုင်တဲ့ သဇင် ၆ အဆောင် ၁၅ မှာ လုယက်မှုဖြစ်ခဲ့ပြီး ဇမ္ဗူသီရိမြို့နယ် ရဲစခန်းကို ဖုန်းဆက်တိုင်ကြားပေမဲ့ လာရောက်ခြင်းမရှိလို့ လုယက်သူတွေက အတင့်ရဲလာတာလို့ နောက်ဝန်ထမ်းတယောက်က ပြောပါတယ်။
“ညပိုင်း လုယက်မှုဖြစ်လို့ ရဲစခန်းဖုန်းဆက်တယ်။ ရဲကမလာတော့ မနက်ကျတော့ ဓားပြပါ ဝင်တိုက်ရော။ ရဲတွေက ငလျင်ကူညီဖို့ထက် ရာထူးတိုးဖို့ လူကြီးလမ်းကြောင်း လိုက်နေကြတာ။ ငလျင်ဖြစ်နေတဲ့အချိန် နေပြည်တော်မှာတောင် အခုလိုဖြစ်တာ။ အခြားနေရာတွေ မတွေးရဲဘူး။”
မတ် ၂၈ ရက်က လှုပ်ခတ်သွားတဲ့ ပြင်းအားမြင့် ငလျင်ကြောင့် နေပြည်တော်မှာ နိုင်ငံတော်သမ္မတ အိမ်တော်ရာ၊ ပို့ဆောင်ဆက်သွယ်ရေးရုံးနဲ့ ဌာနဆိုင်ရာ အဆောက်အအုံ၊ ဆေးရုံနဲ့ ပြည်သူပိုင်နေအိမ် အဆောက်အအုံတွေ ပြိုကျပျက်စီးပြီး သေဆုံးသူ ရာနဲ့ချီကာ ရှိခဲ့ပါတယ်။
စစ်ကောင်စီက မတ် ၃၁ ရက်က ထုတ်ပြန်ထားတဲ့ စာရင်းတွေမှာတော့ သေဆုံးသူ ၂,၀၅၆ ယောက်၊ ဒဏ်ရာရသူ ၃,၉၀၀ ယောက်ကျော်နဲ့ ပျောက်ဆုံးနေသူ ၂၇၀ ယောက် ရှိတယ်လို့ ဖော်ပြထားပေမဲ့ မြေပြင်အချက်အလက်တွေနဲ့ ကွဲလွဲနေတယ်လို့ အရပ်ဘက်အဖွဲ့အစည်းတွေက သုံးသပ်ကြပါတယ်။
