ငလျင်ဒဏ်သင့် မြန်မာနိုင်ငံကို ကူညီဖို့ အိန္ဒိယရေတပ် သင်္ဘော ၂ စင်း ရန်ကုန်မြို့ကို ရောက်ရှိလာခဲ့တဲ့အကြောင် ANI သတင်းမှာ ဧပြီ ၁ ရက်က ဖော်ပြပါတယ်။
INS Satpura နဲ့ INS Savitri အမည်ရတဲ့ ရေတပ် သင်္ဘော ၂ စင်းဟာ သဘာဝဘေး ဒဏ်သင့်သူတွေအတွက် ကယ်ဆယ်ရေးပစ္စည်း တန်ချိန် ၅၀ ကျော် တင်ဆောင်ကာ ရောက်ရှိလာခဲ့တာဖြစ်ကာ ဒီအကြောင်းနဲ့ ပတ်သက်ပြီးတော့ အိန္ဒိယ ပြည်ပရေးရာ ဝန်ကြီး ဒေါက်တာ အက်စ်ဂျိုင်ရှန်ကာကလည်း သူ့ရဲ့ Facebook လူမှုကွန်ရက်စာမျက်နှာပေါ်ကတဆင့် ဓာတ်ပုံတွေကို မျှဝေထားခဲ့ပါတယ်။
အိန္ဒိယနိုင်ငံအနေနဲ့ ငလျင်ဒဏ်ခံ မြန်မာနိုင်ငံကို ထောက်ပံ့ကူညီရေးအတွက် 'Operation Brahma' ကို ပြီးခဲ့တဲ့ စနေနေ့က စတင်ခဲ့တာဖြစ်ကာ ကယ်ဆယ်ရေးနဲ့ ဆေးဘက် ဆိုင်ရာကျွမ်းကျင်သူအဖွဲ့တဖွဲ့နဲ့ ကယ်ဆယ်ရေးပစ္စည်းတွေအပါအဝင် အစားအသောက်၊ ရေ၊ ရွက်ဖျင်တဲတွေ၊ ဆေးဝါးတွေနဲ့ မရှိမဖြစ်လိုအပ်တဲ့ ထောက်ပံ့ရေးပစ္စည်းတွေကို ခုလို အကျပ်အတည်းကာလ လိုအပ်နေချိန်မှာ ကူညီပံ့ပိုးပေးခဲ့ကြောင်းလည်း မြန်မာနိုင်ငံဆိုင်ရာ အိန္ဒိယသံရုံးက ပြောပါတယ်။
မတ် ၂၈ ရက်က စစ်ကိုင်းမြို့အနီးကို ဗဟိုပြုပြီး လှုပ်ခတ်ခဲ့တဲ့ အင်အား ၇ ဒသမ ၇ ရစ်ချ်တာစကေးရှိတဲ့ ငလျင်ကြောင့် ထိခိုက်သေဆုံးသူ ၂,၉၂၈ ယောက်အထိ ရှိနေပြီလို့ မတ်လ ၃၁ ရက်မနက်အထိ DVB က ကောက်ယူရရှိတဲ့ စာရင်းတွေအရ သိရပါတယ်။
လူပေါင်း ၁ သန်းခွဲလောက်နေထိုင်တဲ့ မန္တလေးမှာ သာသနိကအဆောက်အအုံတွေ၊ လမ်းတံတားတွေ ထိခိုက်ပျက်စီးခဲ့ရပြီး တချိန်တည်းမှာပဲ ထိုင်းနိုင်ငံမြို့တော် ဘန်ကောက်မှာလည်း ဆောက်လက်စ အထပ်မြင့်တိုက်တလုံး ပြိုကျခဲ့တာကြောင့် အနည်းဆုံး လူ ၉ ယောက် သေဆုံးခဲ့ရတယ်လို့ ဆိုပါတယ်။
ဒါ့အပြင် ငလျင်ကြောင့် နေပြည်တော် အပါအဝင် မန္တလေးတိုင်း၊ စစ်ကိုင်းတိုင်းနဲ့ ရှမ်းပြည်နယ် တောင်ပိုင်းမှာ သေဆုံးသူများခဲ့ပြီး လူနေအိမ်တွေ၊ လမ်းတံတား အဆောက်အအုံတွေ၊ စေတီပုထိုးနဲ့ ဘာသာရေး အဆောက်အုံတွေ အများအပြား ထိခိုက်ပျက်စီးသွားခဲ့ပါတယ်။