ငလျင်လှုပ်ပြီးနောက် မန္တလေးတက္ကသိုလ်ပင်မဆောင် မီးလောင်တာမှာ တက္ကသိုလ်ဝင်စာမေးပွဲအဖြေလွှာ ၄ သိန်းလောက် မီးလောင်ပျက်စီးခဲ့တယ်လို့ စစ်ကောင်စီက မတ် ၂၉ ရက်မှာ သတင်းထုတ်ပြန်ပါတယ်။
မတ် ၂၈ ရက်က အင်အားပြင်း ငလျင်လှုပ်ခတ်ခဲ့ပြီး စစ်ကိုင်းတိုင်း၊ မန္တလေးတိုင်း၊ မကွေးတိုင်းနဲ့ ရှမ်းပြည်နယ်အရှေ့မြောက်ဒေသ၊ နေပြည်တော်နဲ့ ပဲခူးတိုင်းတို့မှာ ငလျင်ဘေးဒဏ်ကြောင့် အများအပြား ထိခိုက်ပျက်စီးဆုံးရှုံးခဲ့တာပါ။
ပြင်းထန်ငလျင်လှုပ်ခတ်ခဲ့တဲ့အချိန်မှာ စာစစ်လုပ်ငန်းတွေ လုပ်ဆောင်နေတဲ့အချိန်ဖြစ်ပြီး စာစစ်လုပ်ငန်းလုပ်နေတဲ့ ဆရာ၊ ဆရာမ ၂၆၇ လောက်ဟာ ပင်မဆောင်အောက်ကို ထွက်ပြေး တိမ်းရှောင်ခဲ့ကြရတယ်လို့ ဆိုပါတယ်။
မန္တလေးတက္ကသိုလ်ပင်မဆောင်ဟာလည်း ငလျင်ဒဏ်ကြောင့် ပြိုကျပျက်စီးခဲ့တဲ့အပြင် နောက်ဆက်တွဲအဖြစ် မီးလောင်ခဲ့တာကြောင့် ပင်မဆောင်ကြီးတခုလုံး မီးလောင်ပျက်စီး ဆုံးရှုံးခဲ့တာနဲ့အတူ မန္တလေးတိုင်း၊ စစ်ကိုင်းတိုင်းနဲ့ ကချင်ပြည်နယ်တို့က ၂၀၂၄-၂၅ တက္ကသိုလ်ဝင် စာမေးပွဲ အဖြေလွှာတွေလည်း မီးလောင်ပျက်စီးခဲ့ရတယ်လို့ ဆိုပါတယ်။
မန္တလေးတိုင်းက ဖြေဆိုသူဦးရေ ၄၆,၉၄၄ ယောက်ရဲ့ အဖြေလွှာအုပ်ရေ ၂၈၀,၉၄၀ အုပ်၊ စစ်ကိုင်း တိုင်းက ဖြေဆိုသူဦးရေ ၇,၃၁၁ ယောက်ရဲ့ အဖြေလွှာအုပ်ရေ ၄၃,၈၂၇ အုပ်၊ ကချင်ပြည်နယ်က ဖြေဆိုသူဦးရေ ၈,၆၉၉ ယောက်ရဲ့ အဖြေလွှာအုပ်ရေ ၅၂,၁၈၉ အုပ်တို့ မီးလောင်ပျက်စီး ဆုံးရှုံးခဲ့ရတယ်လို့ ထုတ်ပြန်ထားပါတယ်။
မီးလောင်သွားတဲ့ အဖြေလွှာတွေနဲ့ ပတ်သက်ပြီး ဘယ်လိုဆက်လုပ်မယ်ဆိုတာကိုတော့ စစ်ကောင်စီက ထုတ်ပြန်ထားတာမရှိသေးပါဘူး။
