Home
မြန်မာသတင်း
တရုတ်ဘက် တင်ပို့သည့် ဖရဲ ဈေးကောင်းရလာ
DVB
·
March 22, 2025

မြန်မာနိုင်ငံကနေ တရုတ်နိုင်ငံဘက် တင်ပို့နေတဲ့ ဖရဲ ရောင်းလိုအားနည်းပြီး ဝယ်လိုအား များတာကြောင့် ဈေးကောင်းရလာကြောင်း ဖရဲ သခွား လုပ်ငန်းရှင်တွေဆီက သိရပါတယ်။

ဖရဲ သခွား ကုန်သည်တယောက်က “အခုတော့ ဖရဲဈေး တက်နေတယ်။ ၁၂ ဘီးကား စီးပြတ်ကို တရုတ်ငွေ ယွမ် ၅၀,၀၀၀ လောက်တော့ ရောင်းရတယ်။ အခုရက်ပိုင်းအတွင်း ဖရဲက အရည်အသွေး သာကောင်းပါစေ၊ ကြိုက်လွန်းလို့ ထတောင်ခုန်တယ် ” လို့ ပြောပါတယ်။

855 အမျိုးအစား ဖရဲဈေးက လက်ရှိ စီးပြတ် ယွမ် ၄၅,၀၀၀ ကနေ ၆၂,၀၀၀ ဝန်းကျင်ရှိနေပြီး အရည်အသွေး၊ အရောင်အဆင်းပေါ်မူတည်ပြီး ဈေးကွက် ဈေးနှုန်း အပြောင်းအလဲရှိနေပါတယ်။

သခွားမွှေးကတော့ ၁ ကီလိုဂရမ်ကို တရုတ်ငွေ ၄ ယွမ်ကနေ ၅ ယွမ်ကြားရှိကာ အသီး အရည်အသွေး တော်ဝောာ်ကောင်းမှ ၁ ကီလိုဂရမ်ကို ၅ ဒသမ ၂ ယွမ်နဲ့ ၅ ဒသမ ၃ ယွမ် ဝန်းကျင်ရှိပြီး စီးပြတ် ယွမ် ၆၀,၀၀၀ ကနေ ၇၅,၀၀၀ ထိ ရောင်းရတာရှိပြီး အသီးအရည်အသွေးပေါ် မူတည်ကာ ဈေးနှုန်းကွာတယ်လို့ ဆိုပါတယ်။

နောက်ထပ် ဖရဲလုပ်ငန်းရှင်တယောက်က “ဈေးကတော့ ၆၀,၀၀၀ ပါပဲ။ ဒီနှစ်က နည်းတာကိုး။ ဖရဲက အထွက်နည်းသွားပြီ။ တောင်သူတွေ အများကြီး လျော့သွားတာ။ လျော့သွားတာထက်ကို စိုက်ဖို့နေရာတွေ အခက်အခဲ ဖြစ်တာပေါ့” လို့ ပြောပါတယ်။

ဘောင်အုပ် ပလတ်စတစ်အိတ်တွေ၊ ဖရဲစိုက်မယ့် မျိုးစေ့တွေ၊ မြေဩဇာကောင်းတာတွေ၊ ရေပိုက်တွေ စတဲ့ စိုက်ပျိုးရမယ့် ပစ္စည်းတွေ မရတဲ့အပြင် အဓိက ကတော့ မြန်မာပြည်က မြေဩဇာတွေနဲ့ ဖရဲက စိုက်လို့ သိပ်အဆင်မပြေတာကြောင့်လို့ ကုန်သည်က ပြောပါတယ်။

“မူဆယ်လမ်းကြော ပိတ်သွားတော့ ကန့်သတ်သလို ဖြစ်သွားတာပေါ့ဗျာ။ အဲမှာ အဲပစ္စည်းတွေက မရတော့ ဖရဲက စိုက်ရတာ ကသိကအောက် ဖြစ်သွားတာပေါ့လေ။”

လက်ရှိ ဖရဲက စီးပြတ် ပျမ်းမျှ ယွမ် ၆၀,၀၀၀ နဲ့ ယွမ် ၅၀,၀၀၀ အထက် ပတ်ချာလည်ရှိပြီး ယွမ် ၆၀,၀၀၀ ရတဲ့အစီးက တော်တော်အသီးကောင်း၊ အလုံးကြီးတွေက အကြီးကြီးတွေ ရှယ်ဖြစ်မှ၊ ခေါင်သီးဖြစ်မှ ရတာဖြစ်ပြီး အဲဒါကတော့ ၁ဝ စီးမှ တစီးလောက်ပါကာ သူက အမြင့်ဆုံးဈေး ဖြစ်တယ်လို့ ဆိုပါတယ်။

ကားခကတော့ တစီးကို သိန်း ၁၃၀ ကနေ ၁၆၀ အထိ ရှိပြီး ကားလိုအပ်မှုပေါ်မူတည်ကာ ဈေးနှုန်း ကွာဟမှုရှိတယ်လို့ ဆိုပါတယ်။

သခွားသီး ကားအဝင် အစီးရေ ၁၀၀ ကျော်မှာ ဖရဲသီး အဝင် ၇ စီး၊ ၈ စီးသာ ရှိတာကြောင့် ဝယ်လိုအားက ဖရဲဘက် စုပြုံသွားတာဖြစ်ပြီး မိုင်းလားနဲ့ တာလော့ကြားမှာတင် စစ်ဆေးမှု တင်းကျပ်တာကြောင့် သုံးလေးရက်ကြာကာ လမ်းခရီးမှာတော့ တပတ်ဝန်းကျင်ခန့်ကြာပြီး အသီးအရည်အသွေး ထိခိုက်ရကြောင်း လုပ်ငန်းရှင်တွေဆီက သိရပါတယ်။

တောင်သူတွေအနေနဲ့ ကားခ တော်တော်ဈေးမြင့်နေတာကြောင့် အခက်ကြုံကြရပြီး ကားခ သိန်းရာကျော်ရတဲ့ ယာဉ်မောင်းတွေကလည်း လမ်းကြေးတင် ရတဲ့ကားခရဲ့ ထက်ဝက်ဝန်းကျင် ပေးဆောင်ရတဲ့အပြင် လမ်းခရီး ကုန်ကျစရိတ်တွေကြောင့် ယာဉ်ပိုင်ရှင်တွေကို များများစားစား မအပ်နိုင်ဘူးလို့ ဆိုပါတယ်။

ပြီးခဲ့တဲ့ ၂၀၂၄၊ ၉ လိုင်း၊ ၁၀ လပိုင်း၊ ၁၁ လပိုင်းတွေမှာတော့ ဖရဲ အမြင့်ဆုံးဈေး ၁ ကီလိုဂရမ်ကို တရုတ်ငွေ ၉ ယွမ်အထိ ရခဲ့တယ်လို့ ဖရဲကုန်သည်တွေက ပြောပါတယ်။

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024