မိုးကုတ်မြို့က လုပ်ငန်းရှင်တွေအနေနဲ့ အခုလကုန်တဲ့အထိ လုပ်ငန်းလိုင်စင်တွေ လျှောက်ထားဖို့ တအာင်းအမျိုးသားလွတ်မြောက်ရေးတပ်မတော် (TNLA) က အမိန့်တရပ် ထုတ်ပြန်ထားပါတယ်။

မိုးကုတ်မြို့က သဘာဝသယံဇာတတူးဖော်တဲ့ လုပ်ငန်းရှင်တွေ၊ ကုန်သွယ်ရေးလုပ်ငန်းနဲ့ အခြားသောလုပ်ငန်းတွေ လုပ်ကိုင်ဆောင်ရွက်နေတဲ့ လုပ်ငန်းရှင်တွေအနေနဲ့ အခု မတ်လကုန်အထိ လုပ်ငန်းလိုင်စင်တွေ လျှောက်ထားဖို့ TNLA ရဲ့ စီးပွားရေးဌာနမှူး ဗိုလ်ချုပ် တားလမ်ကျော်မြက မတ် ၁၃ ရက်နေ့ရက်စွဲနဲ့ အမိန့်ထုတ်ပြန်ထားပါတယ်။

TNLA သတင်းနှင့်ပြန်ကြားရေးတာဝန်ခံ လွေးယေဦးက “လက်ရှိကတော့ သယံဇာတတူးဖော်ရေးလုပ်ငန်းတွေနဲ့ပတ်သက်ပြီး အသေးစားလုပ်ငန်းတွေကိုပဲ ခွင့်ပြုထားပါသေးတယ်။ အကြီးစားတွေကိုတော့ မူဝါဒတွေ ရေးဆွဲနေဆဲ ဖြစ်ပါတယ်။ ခွင့်မပြုသေးပါဘူး။ ဒီလိုမျိုး လိုင်စင်လျှောက်တာကတော့ လုပ်ငန်းအားလုံး လုပ်ဆောင်ရမှာ ဖြစ်ပါတယ်” လို့ DVB ကို ပြောပါတယ်။

TNLA က ထုတ်ပြန်ထားတဲ့ လုပ်ငန်းလိုင်စင်ကိစ္စကို ပြန်လည်ရုပ်သိမ်းပေးဖို မိုးကုတ်မြို့ အုပ်ချုပ်ရေးကော်မတီရုံးက ပြီးခဲ့တဲ့ မတ် ၄ ရက်မှာ မိုးကုတ်မြို့ရှိ PSLF/ TNLA ရဲ့ မိုးကုတ်ခရိုင်မှူးရုံးကို အကြောင်းကြားခဲ့ပေမဲ့ TNLA က အခုလို မိန့်ထုတ်ပြန်လာတာပဲ ဖြစ်ပါတယ်။

မိုးကုတ်မြို့ဟာ အမေရိကန်ဒေါ်လာ သန်းနဲ့ချီတန်ကြေးရှိတဲ့ နာမည်ကျော် အဖိုးတန်ပတ္တမြားတွေ ထွက်ရှိရာမြို့အဖြစ် ကျော်ကြားပြီး နီလာ၊ ပြောင်ခေါင်းစိမ်း၊ မိုးကုတ်ကျောက်တွေလည်း ထွက်ရှိပါတယ်။

လက်ရှိမှာတော့ အကြီးစား ကျောက်မျက်တူးဖော်ရေးလုပ်ငန်းတွေကို ခွင့်မပြုသေးဘဲ တပိုင်တနိုင် ကျောက်တူးသမားတွေ စားဝတ်နေရေး ပြေလည်စေဖို့ အသေးစားလုပ်ကွက်ကိုပဲ ခွင့်ပြုထားတာလို့ TNLA ထံက သိရပါတယ်။