ထိုင်း-မြန်မာနယ်စပ် ကန်ကျနပူရီခရိုင်ထဲမှာ ကားတစီးထဲအပြည့် ကျပ်ညပ်လိုက်ပါလာတဲ့ တရားမဝင် မြန်မာနိုင်ငံသား ၉ ယောက်နဲ့ ကလေးငယ် ၂ ယောက်တို့ ဖမ်းဆီးခံရကြောင်း ဂျိုးချိုထိုင်းသတင်းမှာ ဖော်ပြပါတယ်။
စစ်တပ်၊ ရဲနဲ့ ရပ်ကျေးလုံခြုံရေးတွေပါတဲ့ ပူးပေါင်းအဖွဲ့ဟာ မနေ့နေ့ခင်းပိုင်းက ဆိုင်းယုတ်မြို့နယ် ဆိုင်းယုတ်-ကန်ကျနပူရီလမ်းမပေါ်ရှိ ထာ့ဆောင်စစ်ဆေးရေးဂိတ်မှာ တာဝန်ထမ်းဆောင်စဉ် MG ဟိုင်းလပ်ကားတစီး ဆိုင်းယုတ်မြို့နယ်ဘက်ကနေ မောင်းဝင်လာတယ်။ စစ်ဆေးဖို့ ရပ်မိန့်ပေးစဉ် ရပ်မပေးဘဲ အရှိန်မြှင့်ဖြတ်မောင်းသွားခဲ့လို့ တာဝန်ရှိသူတွေက ကားနဲ့ အနောက်ကနေ လိုက်ဖမ်းရာမှာ ဆိုင်းယုတ်မြို့နယ် ကရကျဲ့ရပ်ကွက် စာသင်ကျောင်းအနောက် လမ်းကြားမှာ ဖမ်းမိသွားပါတယ်။
ယာဉ်မောင်းမှာ အသက် ၂၃ နှစ်ရွယ်ရှိ နိုင်းဝီရဖုန်းဖြစ်ပြီး ကားထဲမှာ လူတွေ ကျပ်ညပ်ပြွတ်သိပ် လိုက်ပါလာတယ်ကာ အမျိုးသား ၃ ယောက်၊ အမျိုးသမီး ၆ ယောက်၊ စုစုပေါင်း ၉ ယောက် အပြင် ကလေး ၂ ယောက်ပါ ပါလာပြီး မှတ်ပုံတင်အထောက်အထား ဘာမှမရှိကြပါဘူး။
စစ်ဆေးမေးမြန်းရာမှာ သူတို့တွေဟာ ထိုင်းနိုင်ငံ ဘန်ကောက်မှာ အလုပ်သွားလုပ်ဖို့ ကရင်ပြည်နယ် ဘုရားသုံးဆူ တောလမ်းဘက်ကနေ ဆန်ခလပူရီမြို့နယ်ဘက် ခြေကျင်လျှောက်ဝင်လာတယ်၊ အဲဒီကနေ လှေစီးရတယ်၊ ကုန်းပေါ်ပြန်တက်တော့ ကားတစီးက လာကြိုတာလို့ ဆိုပါတယ်။
ယာဉ်မောင်းကတော့ သူ့အနေနဲ့ အဲဒီမြန်မာတွေကို တယောက် ဘတ် ၅၀၀ နှုန်းနဲ့ သွားကြိုလာတယ်၊ ကန်ကျနပူရီမြို့ နောင်ဘိုရပ်ကွက်ထိသာ ပို့ဆောင်ပေးရမှာဖြစ်ပြီး လမ်းခုလတ်မှာ ခုလို အဖမ်းခံလိုက်ရတာလို့ ဆိုပါတယ်။
တာဝန်ရှိသူတွေက သူတို့အားလုံးကို ဆိုင်းယုတ်ရဲစခန်းသို့ ခေါ်ဆောင်သွားပြီး လဝကဥပဒေနဲ့ အရေးယူသွားမယ်လို့ ပြောပါတယ်။
Source: ဂျိုးချို / ကန်ကျနပူရီသတင်း
