ထားဝယ်အထူးစီးပွားရေးဇုန် စီမံကိန်းမှာ ရုရှားအစိုးရနဲ့ စစ်ကောင်စီတို့ ပူးပေါင်းပြီး အကောင်အထည်ဖော်မယ့် ကိစ္စနဲ့ပတ်သက်ပြီး တနင်္သာရီဒေသအရပ်ဖက်အဖွဲ့အစည်းတွေနဲ့ နိုင်ငံရေးအင်အားစုတွေက ကန့်ကွက်လိုက်ပါတယ်။

ဖေဖော်ဝါရီ ၂၃ ရက်က ကျောက်မီးသွေးသုံးလျှပ်စစ်ဓာတ်အားပေးစက်ရုံနဲ့ ရေနံချက်စက်ရုံတွေပါဝင်တဲ့ ထားဝယ်အထူးစီးပွားရေးဇုန် စီမံကိန်းမှာ ရင်းနှီးမြုပ်နှံမှုတွေပြုလုပ်ဖို့ ရုရှားနဲ့ စစ်ကောင်စီတို့  ပူးပေါင်းပြီး သဘောတူလက်မှတ်ရေးထိုးထားခဲ့တာပါ။

ဒါနဲ့ ပတ်သက်ပြီး ကန့်ကွက်တဲ့ အကြောင်း အရပ်ဖက်အဖွဲ့အစည်းတွေနဲ့ နိုင်ငံရေး အင်အားစုတွေ ပူးပေါင်းပြီး မတ်လ ၁၀ ရက်မှာ သဘောထားထုတ်ပြန်လိုက်တာပါ။

ကန့်ကွက်ရာမှာပါဝင်တဲ့ MAGGA Initiative မှ တာဝန်ရှိသူ မယ်ဆုက “အခုချိန်က နိုင်ငံရေး တည်ငြိမ်မှုနဲ့ တရားဥပဒေစိုးမိုးမှု လုံးဝမရှိတဲ့ အနေအထားမို့လို့ ပွင့်လင်းမြင်သာမှုနဲ့ တာဝန်ခံမှု မရှိလည်း ရှိနိုင်မှာ မဟုတ်ဘူး။ ထားဝယ်အထူးစီးပွားရေးဇုန် စီမံကိန်းကဒေသခံတွေ အတွက်မဟုတ်ဘဲ စစ်ကောင်စီနဲ့ ပူးပေါင်းလုပ်ဆောင်မယ့် အဖွဲ့အစည်းတွေပဲ အကျိုးစီးပွားဖြစ်သွားလိမ့်မယ်။ ဒါကြောင့် ကန့်ကွက်တာပါ”လို့ ပြောပါတယ်။

ထားဝယ်အထူးစီးပွားရေးဇုန်ဝန်းကျင်မှာ စစ်ကောင်စီနဲ့ တော်လှန်ရေးတပ်ဖွဲ့တို့မကြာခဏ တိုက်ပွဲဖြစ်ပွားနေပြီး အခုလက်ရှိမှာတော့ စစ်ကောင်စီဘက်က ထားဝယ်အထူးစီးပွားရေးဇုန် စီမံကိန်းနဲ့ပတ်သက်ပြီး မြေပြင်မှာ အကောင်အထည်ဖော်တာတွေ မတွေ့ရသေးပါဘူး။

ထားဝယ်အထူးစီးပွားရေးဇုန်စီမံကိန်းမှာ ၁၉၆ စတုရန်းကီလိုမီတာ ကျယ်ဝန်းပြီး ရေနက်ဆိပ်ကမ်း၊ ကျောက်မီးသွေးသုံးလျှပ်စစ်ဓာတ်အားပေးစက်ရုံ၊ ရေနံချက်စက်ရုံ၊ ရေနံဓာတုစက်ရုံနဲ့ တခြားညစ်ညမ်းစက်ရုံတွေပါဝင်တဲ့ စက်မှုဇုန် စီမံကိန်းများ၊ ရေကာတာနဲ့ မြန်မာ-ထိုင်းနယ်စပ်ကို ဆက်သယ်ထားတဲ့ အဝေးပြေးလမ်းနဲ့ မီးရထားလမ်းတို့ပါရှိတယ်လို့ သိရပါတယ်။

၂၀၁၂ ခုနှစ်မှာ အဆိုပါစီမံကိန်းကို မြန်မာ-ထိုင်း နှစ်နိုင်အစိုးရကြား လက်မှတ်ထိုး အကောင်အထည်ဖော်ခဲ့ပြီး အဓမ္မမြေယာသိမ်းဆည်းမှုနဲ့ ဒေသခံဌာနတိုင်းရင်းသားတွေရဲ့ အတင်းအကျပ် နေရပ်စွန့်ခွာစေရန် ဖိအားပေးမှုတွေအပါအဝင် လူ့အခွင့်အရေးချိုးဖောက်မှုတွေနဲ့ အဂတိလိုက်စားမှုတွေကြောင့် ရပ်ဆိုင်းခဲ့ရပါတယ်။