ရုရှားနဲ့ မြန်မာစစ်အုပ်စုတို့ ကျူးလွန်နေတဲ့ စစ်ရာဇ၀တ်မှုတွေကို အဆုံးသတ်ဖို့ နိုင်ငံတကာအနေနဲ့ နောက်ထပ် ဒဏ်ခတ်ပိတ်ဆို့မှုတွေကို ညှိနှိုင်းဆောင်ရွက်ပြီး အလျင်အမြန် ချမှတ်ဖို့ လိုအပ်နေတယ်လို့ Justice For Myanmar က တောင်းဆိုထားပါတယ်။

ရုရှားနိုင်ငံဟာ မြန်မာစစ်အုပ်စုအတွက် အဓိက လက်နက်တင်သွင်းသူအဖြစ်နဲ့ မြန်မာပြည်သူလူထုအပေါ် စစ်အုပ်စု ကျူးလွန်နေတဲ့ စစ်ရာဇဝတ်မှုတွေ ဆက်လက် လုပ်ဆောင်နိုင်ဖို့ လောင်စာမီးထိုးပေးနေတာ ဖြစ်တယ်လို့ Justice For Myanmar က ထုတ်ပြန်ပါတယ်။

မြန်မာစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ဟာ လူမျိုးတုံးသတ်ဖြတ်မှုနဲ့ ဖမ်းဝရမ်း ထုတ်ခံရအပြီးမှာ  ရုရှားနိုင်ငံကို တပတ်ကြာခရီးစဉ်အဖြစ် သွားရောက်နေပြီး ရုရှားသမ္မတ ပူတင်နဲ့ ဒီနေ့ တွေ့ဆုံမှာဖြစ်ပါတယ်။

ဒီလိုတွေ့ဆုံရာမှာ ရုရှားနဲ့ မြန်မာ ၂ နိုင်ငံ စီးပွားရေးနဲ့ လုံခြုံရေး အပါအဝင် ဆက်ဆံရေး ပိုမိုနက်ရှိုင်းလာစေဖို့ ဆွေးနွေးဖို့ရှိတယ်လို့  စစ်ကောင်စီက ထုတ်ပြန်ထားပါတယ်။