ဧရာဝတီတိုင်း၊ မအူပင်မြို့နယ်မှာ စစ်မှုထမ်းမဲပေါက်တဲ့ လူငယ်ကို စစ်ကောင်စီတပ်က လာရောက်ခေါ်ဆောင်ရာ နေအိမ်မှာမတွေ့လို့ ညီဖြစ်သူအပြင်လမ်းပေါ်တွေ့တဲ့ လူငယ်တယောက်ကိုပါ ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၉ ရက်က အမှတ် ၁၀ ရပ်ကွက်အုပ်ချုပ်ရေးမှူးနဲ့ စစ်ကောင်စီတပ်ဖွဲ့မှာ ည ၈ နာရီခွဲဝန်းကျင်မှာ စစ်မှုထမ်း မဲပေါက်တာကြောင့်လို့ဆိုပြီး လာရောက်ခေါ် ဆောင်တဲ့အခါ လာ ခေါ်တဲ့လူမရှိတဲ့အတွက် ပြန်သွားခဲ့ပြီး လမ်းထိပ်အရောက် ဈေးဝယ်ပြန်လာတဲ့ အခြားလူငယ် တယောက်ကို အကြောင်းမဲ့ဖမ်းဆီးဆွဲခေါ်သွားပြီးနောက် ည ၁၀ နာရီခွဲခန့်မှာ စစ်မှုထမ်းစာရင်းပါတဲ့ လူငယ်ရဲ့ နေအိမ်ကို အုပ်ချုပ်ရေးမှူးနဲ့ စစ်ကောင်စီတပ်ဖွဲ့တွေ ပြန်ရောက်လာပြီး အစ်ကိုမရှိတဲ့အတွက် ညီဖြစ်သူက တာဝန်ယူလိုက်ရ မယ်လို့ဆိုကာ စစ်မှုထမ်းစာရင်းပါသူရဲ့ညီကို ထပ်မံဖမ်းဆီးခေါ်ဆောင်သွားတာလို့ ဆိုပါတယ်။

“လမ်းပေါ်တွေ့တဲ့ လူငယ်က အကြောင်းမဲ့ အဖမ်းခံရတာ။ မိသားစုက ရပ်ကွက်ရုံးသွား အကျိုးအကြောင်းပြောတော့ အုပ်ကြီးက တပ်က လုပ်တာ၊ ငါလုပ်တာမဟုတ်ဘူးလို့ ပြောလိုက်တာ။ နောက်တယောက်ကတော့ စစ်မှုထမ်း မဲပေါက်လို့ အကိုရဲ့အစား ညီလေးဖြစ်သူက ဖမ်းခေါ်ခံရ တာ” လို့ ဖြစ်စဉ်ကိုသိတဲ့ ဒေသခံတယောက်က ပြောပါတယ်။

စစ်ကောင်စီတပ်က လမ်းထိပ်မှာ ဆွဲခေါ်သွားတဲ့လူငယ်ဟာ စစ်မှုထမ်း စာရင်းပါတဲ့ လူငယ်နဲ့ တလမ်းတည်နေထိုင်သူတွေဖြစ်ပြီး ဖမ်းခေါ်ခံသူတွေအားလုံး ဖေဖော်ဝါရီ ၂၁ ရက်အထိ ပြန်မလွတ်သေးဘူးလို့သိရပါတယ်။

အုပ်ချုပ်ရေးအဖွဲ့နဲ့ နီးစပ်သူ ဝန်ထမ်းက “ဒီအကြောင်းကြောင့် ရပ်ကွက်ထဲမှာ တော်တော်ကြောက် လန့်နေကြတယ်။ ဒီလိုလုပ်တာကတော့လွန်လွန်းတာပေါ့။ မအူပင်တပ်က တပ်သားတချို့နဲ့ အုပ်ကြီးကဖမ်းတာ။ ဘယ်မှာဖမ်းထားတယ်ဆိုတာတော့ မသိရေသးဘူး” လို့ ပြောပါတယ်။

၂၀၂၄ ခုနှစ် ဒီဇင်ဘာလ ဒုတိယ အပတ်ကလည်း ဧရာဝတီတိုင်း၊ မအူပင်မြို့မှာ လက်ဖက်ရည်ဆိုင် ထိုင်နေတဲ့ လူငယ် ၅ ယောက်အပါအဝင် လူငယ် ၇ ယောက်အထိ စစ်ကောင်စီတပ်က ပေါ်တာဆွဲဖမ်းခေါ်ခဲ့ပြီး ဒီနေ့အထိ ဖမ်းထားဆဲလို့ ဒေသခံတွေဆီက သိရပါတယ်။

ဧရာဝတီတိုင်း ကျုံပျော်မြို့ပေါ် ရပ်ကွက်တွေနဲ့ ကျေးရွာတွေမှာ စစ်မှုထမ်းအပတ်စဉ် ၁၁ စစ်သင်တန်းတက်ရောက်ဖို့ လူငယ်တွေကို လိုက်လံဖမ်းဆီးနေတယ်လို့ ကျုံပျော်ဒေသခံတွေဆီက သိရပါတယ်။

အသက် ၁၈ နှစ်ကနေ အသက် ၃၅ နှစ်ရှိတဲ့သူတွေကို စစ်မှုထမ်းဖို့အတွက် စစ်တပ်ကနေ သက်ဆိုင်ရာ အုပ်ချုပ်ရေးမှူးတွေဆီ ရပ်ကွက်တခုကို ၁၀ ယောက်နဲ့ ကျေးရွာအုပ်စု ၁ စုကို ၁၀ ယောက်နှုန်း ဆင့်ခေါ်တာတွေရှိတဲ့အပြင် အခုရက်ပိုင်းအတွင်း စစ်တပ်၊ ထွေအုပ်နဲ့ ရဲတွေက ဧည့်စာရင်းအကြောင်းပြပြီး အိမ်ထဲအထိ ဝင်ဖမ်းဆီးတာတွေ လုပ်ဆောင်နေတယ်လို့ ဆိုပါတယ်။

ကျုံပျော်မြို့ ညောင်ပင်သာရပ်ကွက်မှာနေတဲ့ အမျိုးသားတယောက်က “ဖေဖော်ဝါရီလ ၂၀ ရက်နေ့ညက ဧည့်စာရင်းစစ်မယ်ဆိုပြီး အောင်ဆန်းရပ်ကွက် ညောင်ပင်သာ ၃ လမ်းမှာ လူငယ်တွေကို ဝင်ရောက်ဖမ်းဆီးသွားတယ်။ ခုက ရပ်ကွက်ကျေးရွာအုပ်ချုပ်ရေးမှူးတွေက စစ်မှုထမ်းပေးရမဲ့ လူစာရင်းကို မဲနှိပ်ရွေးချယ်တယ်။ မဲပေါက်တဲ့သူတွေရဲ့စာရင်းကို ဘယ်သူကိုမှချမပြဘူး။ ပြီးမှ ရဲစစ်တပ်နဲ့ ရွာကအုပ်ချုပ်ရေးမှူးတွေက ဧည့်စာရင်းစစ်မယ်ဆိုပြီး အိမ်ထဲဝင်ဖမ်းခေါ်သွားတာ”လို့ ပြောပါတယ်။

ကျုံပျော်မြို့နယ်အတွင်း မြို့ပေါ်ရပ်ကွက် ၄ ရပ်ကွက်၊ ကျေးရွာအုပ်စု ၇၉ အုပ်စုရှိပြီး တအုပ်စု ၁၀ ယောက်နှုန်းနဲ့ မြို့ပေါ် ၄ ရပ်ကွက်က အယောက် ၄၀ စစ်တပ်ကိုပေးရမယ်လို့ မြို့ခံတွေက ပြောပါတယ်။

စစ်ကောင်စီက ရှေတန်းစစ်မြေပြင်တွေမှာ စစ်သားအင်အားတွေလိုနေတာကြောင့် မြို့နယ်အလိုက် ပေါ်တာဆွဲတာ လူနေအိမ်တွေထဲထိ ဧည့်စာရင်းအကြောင်းပြပြီး လူငယ်တွေကို ဖမ်းဆီးတာတွေ ပိုမိုလုပ်ဆောင်လာတယ်လို့ စစ်တပ်နဲ့နီးစပ်သူဆီက သိရပါတယ်။

စစ်အာဏာရှင်ဟောင်း သန်းရွှေလက်ထက်က  အကောင်အထည်ဖော်ခဲ့တဲ့ စစ်မှုထမ်း ဥပေဒကို စစ်ကောင်စီက ပြီးခဲ့တဲ့ ၂၀၂၄ ဖေဖော်ဝါရီလက စတင် အသက်သွင်းပြီးနောက် စစ်မှုထမ်းတွေကို ရှေ့တန်းပို့ဆောင်မှာမဟုတ်ဘူးလို့ ပြောဆိထားပါတယ်။

ဒါပေမဲ့ လူငယ်တွေကို အတင်းအဓမ္မစစ်သား စုဆောင်းကာ အချိန် ၃ လဝန်းကျင် စစ်သင်တန်း ပေးပြီး ရှေ့တန်းစစ်မျက်နှာ ပို့တာကြောင့် တိုက်ပွဲတွေအတွင်း သေဆုံးသူအများအပြား ရှိနေတယ်လို့ တပ်တွင်းသတင်း ရင်းမြစ်တွေဆီကနေ သိရပါတယ်။