ကမ္ဘာ့ရွှေစျေးဟာ စံချိန်တင်မြင့်တက်လာခဲ့ပြီး ဖေဖော်ဝါရီ ၁၀ ရက်မှာ ဒေါ်လာ ၂,၉၀၀ အထက်ကို ပထမဆုံးအကြိမ် ရောက်ရှိသွားခဲ့ပါတယ်။

အမေရိကန်သမ္မတ ဒေါ်နယ်ထရမ့်ပ်ရဲ့ စည်းကြပ်ခွန် ကောက်ခံမှုတွေကြောင့် ကုန်သွယ်ရေးစစ်ပွဲ အရှိန်မြင့်လာပြီး ငွေကြေးဖောင်းပွမှာကို စိုးရိမ်မှု မြင့်တက်နေကြတဲ့အတွက် ဘေးအကင်းဆုံးလို့ ယူဆရတဲ့ ရွှေစျေးက တက်လာတာ ဖြစ်ပါတယ်။

လက်ငင်းရွှေစျေး ဟာ ၁၀ ရက်နေ့ ဂရင်းနစ်စံတော်ချိန် ည ၆ နာရီ ၄၅ မိနစ် (မြန်မာစံတော်ချိန် ၁၁ ရက်နေ့ ကူးကာစ သန်းခေါင်ကျော် ၁၂ နာရီ ၁၅ မိနစ်) မှာ တအောင်စကို ၂,၉၀၅ ဒသမ ၂၄ ဒေါ်လာအထိ မြင့်တက်သွားပါတယ်။

အမေရိကန်ရွှေစျေးကတော့ ၁ ဒသမ ၆ ရာခိုင်နှုန်းတောင်တက်ပြီး ၂,၉၃၄ ဒသမ ၄၀ အထိ ရောက်ခဲ့ပါတယ်။

သံမဏိနဲ့ အလူမီနီယမ်ပို့ကုန် အားလုံးအပေါ် ထပ်တိုးစည်းကြပ်ခွန် ၂၅ ရာခိုင်နှုန်းကောက်မယ်လို့ ထရမ့်ပ်က ဖေဖော်ဝါရီ ၉ ရက်မှာ ကြေညာခဲ့ပါတယ်။

ဒါ့အပြင် တခြားနိုင်ငံတွေက အမေရိကန်ကို ကောက်တဲ့အတိုင်း တပြေးညီ လက်တုံ့ပြန် စည်းကျပ်ခွန်တွေပါ ချက်ချင်းပြန်ကောက်မယ်လို့ပါ ကြေညာထားပါတယ်။

ရွှေတုံးစျေးဟာ ဒီနှစ်ထဲမှာ ၇ ကြိမ်အထိ စံချိန်တင် မြင့်တက်လာခဲ့ပြီး ကမ္ဘာ့ဖွံ့ဖြိုးမှု မရေရာတာ၊ ကုန်သွယ်ရေးစစ်ပွဲ ဖြစ်လာနိုင်တာ၊ ငွေကြေးဖောင်းပွမှု မြင့်မားတာတွေကြောင့် ရွှေကို ဘေးကင်းတဲ့ ပိုင်ဆိုင်မှုအဖြစ် စုဆောင်းလာကြပါတယ်။

ရွှေစျေးဟာ တအောင်စကို ဒေါ်လာ ၃,၂၅၀ ကနေ ၃,၅၀၀ အထိ မြင့်တက်နိုင်တယ်လို့ Blue Line Futures က စျေးကွက်မဟာဗျူဟာအကြီးအကဲ ဖိလစ်စထရေဘဲလ်က သုံးသပ်ထားပါတယ်။

Source : Reuters