အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနအောက်က အမှတ် ၁၀၀၅ SSPDF တပ်ရင်းနဲ့ အမှတ် ၁၀၀၈ SSRY တပ်ရင်းတို့ဟာ ရှမ်းတောင်ဒေသကိုအခြေခံတဲ့ တပ်တခုအဖြစ်ပြောင်းလဲဖို့ MOD အောက်က တပ်ရင်းအမှတ်တွေကို ဖေဖော်ဝါရီ ၁ ရက်နေ့မှာ ပြန်အပ်နှံလိုက်တယ်လို့ တပ်ရင်းတာဝန်ရှိသူတွေက ပြောပါတယ်။

ရှမ်းတောင်ဒေသခံတော်လှန်ရေးတပ်ပေါင်းစု SSLRU၊ SSRY နဲ့ SSPDF တပ်ဖွဲ့တို့ ပူးပေါင်းပြီး စုဖွဲ့မှုပုံစံတမျိုးနဲ့ စစ်ကောင်စီတပ်ကို တော်လှန်ရေးပြီးဆုံးအောင်မြင်တဲ့အထိ လက်နက်ကိုင် တော်လှန်သွားမယ်လို့ ဆိုပါတယ်။

SSPDF တာဝန်ရှိသူက “ပြည်ထောင်စုအဆင့်ကနေ ပထဝီနိုင်ငံရေးအရ ရှမ်းတောင်ဒေသကို အခြေခံတဲ့တပ်အဖြစ်နဲ့သွားမှရမယ်လို့ စဉ်းစားမိကြလို့ပါ။ ရည်ရွယ်ချက်က ရှမ်းတောင်အခြေစိုက် တပ်တွေ တစုတစည်းတည်းဖြစ်ဖို့လိုအပ်တယ်ဆိုတာသဘောပေါက်ပြီး တူတဲ့သူတွေနဲ့ အရင်စုဖွဲ့တာပါ” လို့ ပြောပါတယ်။

စုဖွဲ့မှုပုံစံအသစ်ကို မကြာခင်မှာ ပြည်သူကို အသိပေးထုတ်ပြန်ဖို့ရှိပြီး နောက်ထပ် ရှမ်းတောင်အင်အားစု ဘယ်သူကိုမဆို အတူတူပူးပေါင်းနိုင်ဖို့အတွက်လည်း ဖိတ်ခေါ်တယ်လို့ သူကပြောပါတယ်။

SSRY ရဲ့ ပြောရေးဆိုခွင့်ရှိသူက “ပြဿနာတစုံတရာဖြစ်တာမရှိပါဘူး။ NUG ရဲ့ စစ်ဒေသနဲ့ ဆိုင်ရာတာဝန်ရှိတဲ့သူတွေနဲ့ သေချာဆွေးနွေးမှုပြုလုပ်ပြီး နုတ်ထွက်လိုက်တာပါ။ အေးအေးဆေးဆေး ပြေပြေလည်လည် အကုန်ဆွေးနွေးပြီး ခွင့်ပြုချက်ရမှ ထွက်လိုက်တာပါ” လို့ ပြောပါတယ်။

ရှမ်းတောင်တပ်ရင်းတွေဟာ ကရင်နီနဲ့ မိုးဗြဲကတိုက်ပွဲတွေမှာ စစ်ကောင်စီတပ်ကို ပူးပေါင်း တော်လှန်နေကြပြီး ပြီးခဲ့တဲ့ ဇန်နဝါရီ ၂၇ ရက်နေ့မှာ SSLRU က ရဲဘော် ၂ ယောက်နဲ့ SSRY က ရဲဘော်တယောက်တို့က မိုးဗြဲတိုက်ပွဲတနေရာမှာ ကျဆုံးခဲ့ရတယ်လို့ တပ်ရင်းတွေက ထုတ်ပြန်ထားပါတယ်။