မွန်ပြည်နယ်၊ ရေးမြို့နယ်၊ ခလရ ၆၁ တပ်ရင်းကို စက်တင်ဘာ ၂ ရက် မနက် ၉ နာရီမှာ ပြည်သူ့ကာကွယ်ရေးပူးပေါင်းတပ်တွေက လက်နက်ကြီးနဲ့ ပစ်ခတ်တိုက်ခိုက်ခဲ့တယ်လို့ ဒေါနစစ်ကြောင်းနဲ့ မွန်ပြည်တော်လှန်ရေးတပ်က သတင်းထုတ်ပြန်ထားပါတယ်။
တိုက်ခိုက်မှုအတွင်း စစ်ကောင်စီဘက်က လက်နက်ကြီး ပြန်ပစ်ခတ်ပေမဲ့ ပြည်သူ့ကာကွယ်ရေး မဟာမိတ်တပ်တွေဘက်က အထိခိုက်မရှိခဲ့ဘူးလို့ ထုတ်ပြန်ချက်မှာ ဖော်ပြပါရှိပါတယ်။
စစ်ကောင်စီဘက်ကတော့ တိုက်ခိုက်မှုအပြီးမှာ ခလရ ၆၁ အတွင်းကို လူနာတင်ယာဉ် ၂ စင်းနဲ့ ထိခိုက်သူတွေလာသယ်သွားပြီး နောက်ဆက်တွဲအခြေအနေကိုတော့ စုံစမ်းနေဆဲလို့ ဆိုပါတယ်။
စစ်ကောင်စီက ခလရ ၆၁ ကို အင်အား ၁၀၀ နီးပါးနဲ့ အင်အားဖြည့်ဖို့ တပ်အရွှေ့အပြောင်းလုပ်နေစဉ်မှာ တပ်ရင်းကို လက်နက်ကြီးနဲ့ တိုက်ခိုက်ခဲ့တာဖြစ်တယ်လို့ မွန်ပြည်တော်လှန်ရေးတပ် ပြန်ကြားရေးတာဝန်ခံက ဒီဗွီဘီကို ပြောပါတယ်။
အခုတိုက်ခိုက်မှုမှာ တောင်ပိုင်းစစ်ဒေသ၊ အမှတ် ၃ စစ်ဒေသခွဲက ဒေါနစစ်ကြောင်း၊ ABSDF၊ MSRF၊ YGF နဲ့ KNLA စတဲ့ မွန်၊ ကရင်၊ တနင်္သာရီ ဒေသ ၃ ခုက ပူးပေါင်းအဖွဲ့တွေ ပါဝင်ပါတယ်။
ဩဂုတ် ၂၈ ရက် ကလည်း အဆိုပါအဖွဲ့တွေအပြင် အခြားမဟာမိတ်အဖွဲ့တွေ ပါဝင်တဲ့ မိုးကြိုးစစ်ဆင်ရေးကို ရေးမြို့အခြေစိုက် စကခ ၁၉ နဲ့ ခလရ ၆၁ ကို မောင်းသူမဲ့လေယာဉ်နဲ့ ဗုံးချပြီး စစ်ရေးဖော်ဆောင်ခဲ့ပါသေးတယ်။
