တလအတွင်း ကရင်အမျိုးသားအစည်းအရုံး (ကေအန်ယူ) အုပ်ချုပ်နယ်မြေထဲမှာ တိုက်ပွဲပေါင်း ၄၃၅ ကြိမ်ဖြစ်ပွားခဲ့ပြီး အာဏာသိမ်း စစ်ကောင်စီတပ်နဲ့ နယ်ခြားစောင့်တပ် BGF တွေဘက်က ၃၉၉ ယောက် သေဆုံးပြီး ၃၁၃ ယောက် ထိခိုက်ဒဏ်ရာရရှိခဲ့တယ်လို့ ထုတ်ပြန်ပါတယ်။

ကေအန်ယူက ပြီးခဲ့တဲ့ ဇန်နဝါရီ ၁ လတာအတွင်း တိုက်ပွဲသတင်းထုတ်ပြန်ချက်မှာ ခုလိုဖော်ပြထားတာဖြစ်ပြီး ကော်သူးလေ အုပ်ချုပ်နယ်မြေထဲမှာ ကရင်အမျိုး သားလွတ်မြောက်ရေးတပ်မတော် (KNLA)၊ ကရင်အမျိုးသားကာကွယ်ရေးတပ် (KNDO) နဲ့ အာဏာသိမ်း စစ်ကောင်စီတပ်၊ နယ်ခြားစောင့်တပ် BGF တို့အကြား တိုက်ပွဲတွေဖြစ်ပွားခဲ့တာလို့ ဆိုပါတယ်။

ဒီတိုက်ပွဲတွေတွင်းမှာတော့ KNLA နဲ့ KNDO တို့ဘက်က ၇ ယောက် တိုင်းပြည်နဲ့ လူမျိုးအတွက် အသက်စွန့်ခဲ့ရပြီး ထိခိုက်ဒဏ်ရာရရှိခဲ့သူ ၂၄ ယောက် ရှိခဲ့တယ်လို့ ဆိုပါတယ်။

အာဏာသိမ်းစစ်ကောင်စီတပ်တွေနဲ့ နယ်ခြားစောင့်တပ် BGF တပ်တွေဟာ ပြည်သူလူ ထုနေထိုင်ရာ ကျေးရွာနဲ့ လုပ်ငန်းခွင်တွေထဲကို နေ့တိုင်းနီးပါး လက်နက်ကြီးတွေ ပစ်ချနေပြီး ကေအန်ယူ - မူတြော်ခရိုင်နဲ့ ဒူးပလာယာခရိုင် ထိန်းချုပ်နယ်မြေတွေထဲမှာလည်း လေယာဉ်နဲ့ ဗုံးကြဲမှုတွေ ရှိခဲ့တယ်လို့ ဆိုပါတယ်။

အရပ်သားပြည်သူ ထိခိုက်သေဆုံးမှုအနေနဲ့ ဇန်နဝါရီတစ်လတာအတွင်း အာဏာသိမ်း စစ်ကောင်စီတပ်တွေနဲ့ နယ်ခြားစောင့်တပ်တွေ ပစ်ခတ်တိုက်ခိုက်မှုကြောင့် ၁၂ ယောက်  သေဆုံးခဲ့ရပြီး ၃၂ ယောက် ထိခိုက်ဒဏ်ရာရရှိခဲ့တယ်လို့ ဆိုပါတယ်။

ဒါ့အပြင် ကေအန်ယူ - ကရင်အမျိုးသားအစည်းအရုံး ဒူးသထူခရိုင်၊ ညောင်လေးပင်ခရိုင်၊ မြိတ်ထားဝယ်ခရိုင်၊ မူတြော်ခရိုင်နဲ့ ဒူးပလာယာခရိုင်တွေထဲမှာ အာဏာသိမ်းစစ်ကောင်စီရဲ့ စစ်ရေးလှုပ်ရှားမှုတွေကြောင့် ပြည်သူ ၇ သောင်းကျော် တောတောင်တွေထဲမှာ ထွက် ပြေးတိမ်းရှောင်နေကြရတယ်လို့ ဆိုပါတယ်။

မြန်မာနိုင်ငံမှာ စစ်ကောင်စီက မတရားအာဏာသိမ်းယူထားခဲ့တဲ့ ကာလဟာ တနှစ်ကျော် ကြာမြင့်ခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ ဒေသအနှံ့ တိုင်းရင်းသားလက်နက်ကိုင်တပ်တွေ၊ ဒေသခံပြည်သူ့ကာကွယ်ရေးတပ်ဖွဲ့တွေနဲ့ စစ်ကောင်စီတပ်တွေကြား တိုက်ပွဲတွေလည်း ပြင်းထန်နေတာပါ။